មានន័យយ៉ាងម៉េច? កម្មវិធីទូរទស្សន៍ជប៉ុនមួយ ដំណើរការ១៥ឆ្នាំហើយ ដោយគ្រាន់តែបង្ហាញនារីៗរត់ឡើងទីទួល ហើយក៏ចប់ (មានវីដេអូ)

ជប៉ុន៖ កម្មវិធីឈ្មោះថា Zenryokuzaka របស់ស្ថានីយទូរទស្សន៍ TV Asahi គឺជាកម្មវីធីមួយមានភាពល្បីល្បាញយ៉ាងខ្លាំង និងចម្លែក ដែលបានដំណើរការអស់រយៈ១៥ឆ្នាំមកហើយ។

កម្មវិធីនេះ ចាក់ផ្សាយជារៀងរាល់ថ្ងៃចន្ទ រហូតដល់ថ្ងៃព្រហស្បតិ៍ នាវេលាម៉ោង១:២០នាទីរំលងអធ្រាត្រ និងក្នុងមួយភាគ មានរយៈពេលមិនលើសពី៦នាទីឡើយ ដោយរាប់បញ្ចូលទាំងឈុតបើកឆាកកម្មវិធីដំបូង និងចុងបញ្ចប់បង្ហាញនៃឈ្មោះក្រុមការងារផលិតកម្មវិធី។ នៅក្នុងភាគនីមួយៗ មិនមានអ្វីច្រើនឡើយ ដោយគ្រាន់តែបង្ហាញឲ្យឃើញពីនារីៗ រត់ឡើងផ្លូវទីទួលខ្ពស់ និងរត់ហត់ហើយក៏ដកដង្ហើមដង្ហក់ ហើយចប់តែម្ដង។

ចំពោះអ្នកចូលរួមកម្មវិធី គឺសុទ្ធសឹងជានារីៗ ដែលជាតារាសម្ដែង តារាល្បីល្បាញនៅលើបណ្ដាញសង្គម និងតារាកំប្លែង ហើយបើគិតមកទល់ពេលនេះ វាមានចំនួន៣,០០០ភាគ ដែលមានមួយភាគប៉ុណ្ណោះ ធ្លាប់បានអញ្ចើញតារាប្រុសម្នាក់ឲ្យចូលរួម តែទទួលបានការរិះគន់យ៉ាងខ្លាំងផងដែរ។

យ៉ាងណាមិញ អត្ថន័យនៃកម្មវិធីទាំងមូលមិនត្រូវបានគេដឹងលម្អិតឡើយ ដោយនៅក្នុងភាគនីមួយៗ គេតែងតែឮសំឡេងដែលបញ្ចូល ដោយនិយាយថា “នេះជាទីទួលមួយ ដែលធ្វើឲ្យអ្នកចង់ឡើងវា”៕

សូមទស្សនារូបភាពនិងវីដេអូខាងក្រោម៖

ប្រភព: Oddity