បរទេស៖ ក្រុមអ្នកអភិរក្សនិយាយថា សត្វឥន្ទ្រីមួយក្នុងចំណោមសត្វឥន្ទ្រីធំៗជាងគេបំផុត នៅលើលោក សឹងតែគ្មានឱកាសក្នុងការរស់នៅក្នុងព្រៃអាម៉ាហ្សូន ដោយសារតែការកាប់បំផ្លាញ។ យោងតាមការសិក្សាថ្មីមួយបានបង្ហាញថា បក្សីកំពុងតែជួបផលវិបាកក្នុងការចិញ្ចឹមកូនៗរបស់វា ក្នុងផ្នែកខ្លះនៃព្រៃទឹកភ្លៀង ដែលត្រូវបានគេកាប់ដើមឈើ។ ប្រហែល១៧ភាគរយនៃព្រៃអាម៉ាហ្សូន ត្រូវបានបំផ្លាញក្នុងរយៈពេល៥០ឆ្នាំ ហើយការខាតបង់បានកើនឡើងនាពេលថ្មីៗនេះ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សប្រភេទឥន្ទ្រី harpy គឺមានទំហំធំជាងគេបំផុតនៅទ្វីបអាមេរិក ដោយមានក្រញាំយ៉ាងធំ សម្រាប់ប្រមាញ់សត្វស្វានិងសត្វស្លុត នៅលើដើមឈើ។ ព្រៃអាម៉ាហ្សូនត្រូវបានគេចាត់ទុកថា ជាជម្រកចុងក្រោយសម្រាប់ឥន្ទ្រី harpy ដែលមានចំនួនជាង៩០ភាគរយ ត្រូវបានគេគិតថាបានរស់នៅទីនេះ។
អ្នកស្រាវជ្រាវ លោក Carlos Peres ជាសាស្ត្រាចារ្យផ្នែកវិទ្យាសាស្ត្របរិស្ថាននៃសាកលវិទ្យាល័យ University of East Anglia ក្នុងចក្រភពអង់គ្លេស បាននិយាយថា បក្សីនេះស្ថិតនៅក្នុងចំណោមសត្វរាប់លានក្បាលក្នុងព្រៃអាម៉ាហ្សូន ដែលតំបន់ភូមិសាស្ត្ររបស់វាកំពុងបាត់បង់។
លោកនិយាយថា៖ «ដោយចាត់ទុកថាសត្វឥន្ទ្រី harpy មានវដ្ដជីវិតយឺតបំផុតនៃសត្វបក្សីទាំងអស់ ឱកាសនៃការសម្របខ្លួនទៅនឹងទិដ្ឋភាពកាប់បំផ្លាញព្រៃឈើ គឺស្ទើរតែសូន្យទៅហើយ។»
លោកសាស្ត្រាចារ្យ Peres បានបន្ថែមទៀតថា វិធានការអភិរក្សដូចជាបំលាស់ទីកន្លែងកូនឥន្ទ្រី និងបំពេញបន្ថែមរបបអាហាររបស់ពួកវា នឹងមានសារៈសំខាន់ចំពោះការរស់រានរបស់ប្រភេទសត្វនេះ។ សត្វឥន្ទ្រី harpy គឺជាសត្វមួយក្នុងចំណោមបក្សីធំៗប្រមាញ់សត្វជាអាហារ ក្នុងពិភពលោក ដែលមីញីមានទម្ងន់រហូតដល់១០គីឡូក្រាម៕
ប្រភព: BBC