ដឹងចិត្តអ្នកប្រើប្រាស់! ទីបំផុតកម្មវិធីតេឡេក្រាម អាចខលវីដេអូជាក្រុមបានហើយ

បរទេស៖ នៅទីបំផុត កម្មវិធីផ្ញើសារតេឡេក្រាមបានន្ថែមមុខងារវីដេអូខលជាក្រុម ទៅកាន់កម្មវិធីទូរសព្ទនិងកុំព្យូទ័រហើយ។ ការឆាតជាសំឡេងនៅក្នុងក្រុមនៅលើវេទិកានេះ អាចប្រែក្លាយទៅជាវីដេអូខល ដោយគ្រាន់តែចុចរូបកាមេរ៉ា ដើម្បីប្រើប្រាស់មុខងារជាវីដេអូវិញ។

តេឡេក្រាមបាននិយាយថា ចំនួនអ្នកប្រើប្រាស់គ្មានកំណត់អាចចូលរួម ការខលជាសំឡេង ប៉ុន្តែវីដេអូខលវិញនឹងត្រូវកំណត់ចំនួនមនុស្ស ត្រឹម៣០នាក់ដំបូង ដែលចង់ចូលរួមជជែក។ ក្រុមហ៊ុនមួយនេះក៏មានគម្រោង បន្ថែមចំនួនមនុស្សឲ្យបានច្រើនជាងនេះ ក្នុងពេលឆាប់ៗ នេះបើយោងតាមសេចក្ដីប្រកាស។ អ្នកប្រើប្រាស់ក៏អាចចែកអេក្រង់ កំឡុងពេលការហៅជាវីដេអូផងដែរ។

ទន្ទឹមនឹងមុខងារវីដេអូខលដែលរង់ចាំអស់ពេលជាយូរ កម្មវិធីតេឡេក្រាមបានបន្ថែមមុខងារថ្មីៗជាច្រើនទៀត រួមមានការកាត់បន្ថយសំឡេងរំខាន និងចលនាផ្ទៃខាងក្រោយ។ អ្នកប្រើប្រាស់តេឡេក្រាមនៅលើ iOS និង Android អាចជ្រើសរើសពីការកំណត់ទម្រង់ដើមនានា ឬក៏អាចបង្កើតចលនាផ្ទៃខាងក្រោយផ្សេងៗដោយខ្លួនឯង៕

ប្រភព: The Verge