កូនក្ដីអត់លុយឲ្យ ស្រាប់តែមេធាវីមួយរូបនេះ ទទួលក្ដាមជំនួសលុយវិញ

ហ្វីលីពីន៖ ថ្មីៗនេះ មេធាវីម្នាក់ឈ្មោះថា Noel Allen Bose មកពីទីក្រុង Sorsogon ប្រទេសហ្វីលីពីន បានបង្កឲ្យមានការភ្ញាក់ផ្អើលនៅលើបណ្ដាញសង្គមហ្វេសប៊ុក បន្ទាប់ពីបង្ហោះរូបភាពមួយសន្លឹក ដែលបង្ហាញឲ្យឃើញថា លោកកំពុងឈរកាន់ក្ដាមមួយបាច់ នៅពីមុខតុលាការ។

យោងតាមសំណេររបស់មេធាវីដ៏ចិត្តល្អរូបនេះ បានសរសេររៀបរាប់ថា បន្ទាប់ពីសាវការបញ្ចប់រួចមក កូនក្ដីរបស់លោកបានដើរមករកលោក និងប្រាប់ថា គេមិនមានប្រាក់គ្រប់គ្រាន់សម្រាប់បង់ថ្លៃឈ្នួលឡើយ ហើយក៏សួរលោកថា អាចយកក្ដាមមួយបាច់នេះជំនួសប្រាក់បានឬអត់។ ឮដូច្នេះ លោកក៏មិនមានភាពស្ទាក់ស្ទើរក្នុងចិត្តដែរ ដោយយល់ព្រមភ្លាមៗតែម្ដង។

យ៉ាងណាមិញ ជុំវិញការបង្ហោះខាងលើនេះ ទទួលបានការកោតសរសើរយ៉ាងខ្លាំងពីសំណាក់មហាជន និងចុច Like រហូតដល់ទៅជាង១សែនឯណោះ ហើយលោកមេធាវី ក៏បានចម្អិនក្ដាមសម្រាប់បរិភោគ និងបង្ហោះរូបភាពឲ្យគេបានឃើញទៀតផងដែរ៕

សូមទស្សនារូបភាពខាងក្រោម៖

ប្រភព: worldoffbuzz