បរទេស៖ ភពឧស្ម័នចំនួនពីរត្រូវបានរកឃើញ ធ្វើដំណើរតាមគន្លងផ្កាយដូចព្រះអាទិត្យ ដែលមានរយៈចម្ងាយ៣៥២ឆ្នាំពន្លឺពីផែនដី ហើយអ្នកវិទ្យាសាស្ត្រមិនទទួលបានការបណ្ដុះបណ្ដាល បានជួយស្វែងរកពួកវា ស្របពេលដែលធ្វើការជាមួយក្រុមតារាវិទូ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សភពក្រៅប្រព័ន្ធព្រះអាទិត្យទាំងពីរនេះត្រូវបានគេឲ្យឈ្មោះថា ភព b និងភព c។ ពួកវាវិលជុំវិញផ្កាយដែលមានឈ្មោះថា HD 152843 ដែលមានម៉ាសប្រហាក់ប្រហែលនឹងព្រះអាទិត្យរបស់យើង ប៉ុន្តែមានទំហំធំជាង១.៥ដង និងភ្លឺជាងបន្តិច។ ការរកឃើញរបស់ពួកគាត់ត្រូវបានចេញផ្សាយ កាលពីដើមខែនេះ នៅក្នុងទិនានុប្បវត្តិ Monthly Notices of the Royal Astronomical Society។
ភព b មានទំហំស្រដៀងគ្នានឹងភពណិបទូន ហើយប្រហែលធំជាងផែនដី៣.៤ដង។ វាមានគន្លងគោចរមួយជុំវិញផ្កាយរបស់វា ចំនួន១២ថ្ងៃនៅលើផែនដី។ ចំណែកភព c មានទំហំ៥.៨ដងធំជាងផែនដីរបស់យើង ហើយវាមានគន្លងគោចរមួយជុំវិញផ្កាយរបស់វា ចន្លោះពី១៩ទៅ៣៥ថ្ងៃនៃផែនដី។
អ្នកមិនជំនាញផ្នែកវិទ្យាសាស្ត្រអាចជួយស្វែងរកភពទាំងនេះ ដោយចូលរួមនៅក្នុងកម្មវិធី Planet Hunters TESS។ គម្រោងដែលឧបត្ថម្ភថវិកាដោយអង្គការណាសា នៅលើគេហទំព័រ Zooniverse រួមមានអ្នកចូលរួមច្រើនជាង២៩,០០០នាក់ នៅជុំវិញពិភពលោក។ វាអនុញ្ញាតឲ្យមនុស្សទូទៅ ជួយស្វែងរកភពក្រៅប្រព័ន្ធព្រះអាទិត្យ ដោយប្រើប្រាស់ទិន្នន័យពីផ្កាយរណប Transiting Exoplanet Survey Satellite (TESS) របស់ណាសា៕