អង់គ្លេស៖ ខ្សែប្រយុទ្ធ Raheem Sterling ត្រូវបានគេរាយការណ៍ថាគ្មានបំណងចង់ចាកចេញពីក្លិប Manchester City ដើម្បីផ្ទេរទៅក្លិប Tottenham Hotspur នោះឡើយ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សថ្មីៗនេះមានព័ត័មានលេចឮថា Man City ដាក់សំណើទឹកប្រាក់១០០លានផោន(ស្មើនឹងប្រមាណ១៣៩.៣លានដុល្លារ) ដើម្បីទិញយកខ្សែប្រយុទ្ធ Harry Kane ពី Spurs និងរីករាយយក Sterling ទៅធ្វើជាផ្នែកមួយនៃសំណើនេះ តែកីឡាកររូបនេះបដិសេធភ្លាមថាមិនចង់ទៅលេងនៅ Spurs ទេ នេះបើយោងតាម ESPN ។
ឥលូវនេះ Raheem Sterling កំពុងជាប់ភារកិច្ចលេងឲ្យក្រុមជម្រើសជាតិអង់គ្លេសក្នុងព្រឹត្តិការណ៍បាល់ទាត់ Euro 2020 និងទើបតែស៊ុត១គ្រាប់ជួយឲ្យអង់គ្លេសយកឈ្នះ ឆេក ១ ទល់នឹង ០ នៅវគ្គចែកពូលកាលពីយប់ថ្ងៃទី២៣កន្លងទៅដោយ Sterling ស្នាក់នៅក្លិប Manchester City តាំងពីឆ្នាំ២០១៥ និងបានឈ្នះពានចំនួន៩លើកជាមួយក្លិប ក្នុងនោះមានពាន Premier League ចំនួន៣ផងដែរ។
នៅរដូវកាលនេះ Sterling មិនសូវជាបានជាប់ជម្រើស១១នាក់ដំបូងញឹកញាប់ដូចរដូវកាលមុនៗនោះឡើយ ដែលធ្វើឲ្យអនាគតរបស់គេជាមួយក្លិបនៅស្រពេចស្រពិលខណៈកុងត្រារបស់គេនៅសល់២ឆ្នាំទៀតឯណោះ។
កីឡាករវ័យ២៦ឆ្នាំរូបនេះ បានបង្ហើបថាគេចង់ចាកចេញពីទឹកដី Etihad ដោយស្ម័គ្រចិត្ត មិនមែនចាកចេញដោយការបង្ខិតបង្ខំនោះទេ។
ដោយឡែក ខ្សែប្រយុទ្ធ Harry Kane ឯណេះវិញក៏ទំនងជាចង់ចាកចេញពី Spurs ណាស់ដែរ ប៉ុន្តែលោកប្រធាន Daniel Levy បានបដិសេធសំណើទឹកប្រាក់ជិត១៤០លានដុល្លារពី Manchester City ដោយមិនស្រណោះស្របពេលកុងត្រារបស់គេនៅសល់៣ឆ្នាំទៀត៕
ប្រភព៖ dailymail