សំពៅបច្ចេកវិទ្យា AI គ្មានមនុស្សបើក ប៉ុនប៉ងធ្វើដំណើរពីអង់គ្លេសទៅអាមេរិក តែបែរជាជួបបញ្ហាមួយ

អង់គ្លេស៖ សំពៅគ្មានមនុស្សបើកមួយគ្រឿងដែលត្រូវបានរចនាឡើង ដើម្បីសាងប្រវត្តិសាស្ត្រសាជាថ្មី ដូចការធ្វើដំណើររបស់សំពៅ Mayflower ឆ្លងកាត់មហាសមុទ្រអាត្លង់ទិកកាលពី៤០០ឆ្នាំមុន ត្រូវបានវិលត្រលប់មកចក្រភពអង់គ្លេសវិញ បន្ទាប់ពីមានកំហុសការអភិវឌ្ឍផលិត។ សំពៅគ្មានមនុស្សបើកឈ្មោះថា Mayflower Autonomous Ship (MAS) ត្រូវបានកំណត់ការធ្វើដំណើរ កាលពីថ្ងៃអង្គារ សប្ដាហ៍មុន សម្រាប់រយៈចម្ងាយ៥,៦៣០គីឡូម៉ែត្រ ពីទីក្រុង Plymouth ក្នុងចក្រភពអង់គ្លេស ទៅកាន់រដ្ឋ Massachusetts សហរដ្ឋអាមេរិក។

ក្រុមអ្នកដឹកនាំគម្រោងបាននិយាយថា វាគ្រាន់តែមានបញ្ហាមេកានិចតិចតួចប៉ុណ្ណោះ ដែលពួកគាត់នឹងវាយតម្លៃនិងជួសជុល។ ការធ្វើដំណើរទៅសហរដ្ឋអាមេរិកត្រូវបានគេរំពឹងទុកថា នឹងចំណាយពេលប្រហែល៣សប្ដាហ៍។ សំពៅបច្ចេកវិទ្យាប្រវែង១៥ម៉ែត្រដើរដោយថាមពលពន្លឺព្រះអាទិត្យ អាចបង្កើនល្បឿនរហូតដល់២០គីឡូម៉ែត្រក្នុងមួយម៉ោង ហើយនឹងត្រូវបាននាំផ្លូវដោយបញ្ញាសិប្បនិម្មិត AI ជាមួយកាមេរ៉ាចំនួន៦ និងឧបករណ៍ចាប់សញ្ញាចំនួន៥០ទៀត។

សំពៅបច្ចេកវិទ្យាមួយនេះចាប់ផ្ដើមជួបបញ្ហា កាលពីថ្ងៃសុក្រ និងត្រូវបញ្ជាឲ្យត្រលប់មកទីក្រុង Plymouth វិញ។ សំពៅនេះត្រូវបានបង្កើតឡើង ដើម្បីបង្ហាញពីការវិវឌ្ឍន៍នៃបច្ចេកវិទ្យាប្រចាំសតវត្សរ៍ ចាប់តាំងពីក្រុមអាណានិគមអង់គ្លេស Pilgrim Fathers បើកសំពៅទៅរកទឹកដីថ្មី៕