មិនហ៊ានទិញគេញុំា រៀនធ្វើជ្រក់សណ្ដែកបណ្ដុះនៅផ្ទះតាមវិធីងាយស្រួល

អាហារ៖ ជ្រក់សណ្ដែកបណ្ដុះ ដែលយើងយករៀនពេលនេះគឺមិនដូចជ្រក់ទូទៅនោះទេ​ ព្រោះយើងមានរូបមន្តពិសេសដែលធ្វើឲ្យជ្រក់មានរសជាតិកាន់តែឆ្ងាញ់។ ជ្រក់សណ្ដែកបណ្ដុះនេះ គេពេញនិយមចូលចិត្តនៅកូរ៉េ ហើយវាក៏ពេញនិយមនៅស្រុកខ្មែរយើងដែរ ។ ជាទូទៅជ្រក់នេះយើងអាចរកញុំាបានតែនៅក្នុងភោជនីយដ្ឋានប៉ុណ្ណោះ ព្រោះវាមានតម្លៃថ្លៃនិងមិនសូវមានអ្នកចេះធ្វើនោះទេ ឥលូវនេះយើងអាចធ្វើវាទុកញុំាជាមួយសាច់ឬម្ហូបផ្សេងៗបានតាមរយៈវិធីខាងក្រោម៖

គ្រឿងផ្សំ៖ 

១. សណ្ដែកបណ្ដុះ កន្លះគីឡូក្រាម

២. អំបិល ១ស្លាបព្រាបាយ

៣. អំបិលគ្រោះ ១ស្លាបព្រាបាយ

៤. ស្ករស ពាក់កណ្ដាលកន្លះស្លាបព្រាបាយ

៥. ប្រេងល្ង ២ស្លាបព្រាបាយ

៦. ម្រេចម៉ត់ បន្ដិច

៧. ល្ងម៉ត់ ១ស្លាបព្រាបាយ 

៨. ខ្ទឹមស ម៉ត់ ១ស្លាបព្រាបាយ

៩. ខ្ទឹមបារាំង ១ផ្លែ (ហាន់តូចៗ)

របៀបធ្វើ៖

១. ដំបូងត្រូវយកសណ្ដែកបណ្ដុះមករើសសំបកវាចេញឲ្យស្អាត ហើយលាងជាមួយទឹកត្រជាក់ រួចទុកឲ្យស្ងួតទឹកសិន។

២. យកឆ្នាំងមួយដាក់ទឹក១០ទៅ១២កូនចានដើម្បីដាំ ហើយដាក់អំបិល១ស្លាបព្រាបាយ រួចដាក់សណ្ដែកបណ្ដុះចូលបិទគម្របឆ្នាំង។ បើកភ្លើងខ្លាំងដាំវារយៈពេល៤នាទី បន្ទាប់មកបិទភ្លើងទុកវា១នាទីទៀត (កុំទាន់បើកគម្របឆ្នាំង បើមិនទាន់គ្រប់៤នាទី) ។

៣. ពេលគ្រប់នាទីហើយ យកសណ្ដែកបណ្ដុះនោះទៅលាងជាមួយទឹកត្រជាក់ដើម្បីឲ្យវាត្រជាក់ ហើយទុកឲ្យស្ងួតទឹក ។ ពេលស្ងួតទឹកហើយ យកសណ្ដែកមកដាក់ក្នុងចានមួយ ចុងក្រោយយកគ្រឿងទាំងអស់ដែលនៅសល់ដូចជា អំបិលគ្រោះ ស្ករស ប្រេងល្ង ល្ងម៉ត់ ខ្ទឹមសម៉ត់ ខ្លឹមបារាំងដែលហាន់ហើយ (ថែមម្ទិះក៏បាន បើសិនចូលចិត្តហិរ) ដាក់លាយច្របល់ចូលគ្នាឲ្យសព្វសាច់ជាការស្រច។

យើងអាចញុំាជ្រក់សណ្ដែកបណ្ដុះនេះ ជាមួយសាច់អាំង ឬជាមួយបាយ ទៅតាមចំណង់ចំណូលចិត្តរបស់យើងបានយ៉ាងឆ្ងាញ់៕

ប្រភព៖​ Seonkyoung Longest