អេស្ប៉ាញ៖ ក្លិប Real Madrid ត្រូវបានគេរាយការណ៍ថាបានជូនដំណឹងទៅក្លិបកាំភ្លើងធំ Arsenal ថាក្លិបមិនមានគម្រោងលក់ ខ្សែបម្រើ Martin Odegaard នោះឡើយ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សOdegaard ដែលផ្ទេរមក Arsenal ក្នុងលក្ខខណ្ឌខ្ចីជើងកាលពីខែមករាកន្លងទៅ ទំនងជាមិនបន្តលេងនៅ Arsenal ទៀតឡើយនិងត្រូវ Real Madrid កោះហៅឲ្យត្រឡប់ទៅរួមក្រុមវិញសម្រាប់រដូវកាលថ្មីក្រោមការដឹកនាំរបស់លោកគ្រូ Carlo Ancelotti បន្ទាប់ពីបង្ហាញខ្លួនបាន២០ប្រកួតនិងរកបាន២គ្រាប់ឲ្យ Arsenal។
ប៉ុន្តែការសម្រេចចិត្តនេះអាចផ្លាស់ប្ដូរ លុះត្រាណាតែ Arsenal ព្រមឲ្យ ខ្សែបម្រើ Emile Smith Rowe មក Real Madrid នេះបើយោងតាមការរាយការណ៍ពី CBS Sports ។
យ៉ាងណាមិញ មិនទាន់មានការចរចាណាមួយធ្វើឡើងរវាងក្លិបទាំងពីរទាក់ទងនឹង Smith Rowe ទេប៉ុន្តែ Arsenal នៅតែចង់បាន Odegaard ខណៈ Real Madrid កំពុងសម្លឹងឃើញសមត្ថភាពរបស់ Smith Rowe ដែរ ។
ខ្សែបម្រើ Emile Smith Rowe ចាត់ទុកជាតារាឆ្នើមវ័យក្មេងម្នាក់ដែលបណ្ដុះចេញពីថ្នាលយុវជនរបស់ Arsenal ផ្ទាល់ ហើយក្លិបទើបតែបដិសេធមិនលក់រូបគេទៅឲ្យ Aston Villa ក្នុងតម្លៃ ២៥លានផោន(ស្មើនឹងប្រមាណ៣៤.៩លានដុល្លារ)ទៀតផង។
កីឡាករវ័យ២០ឆ្នាំរូបនេះធ្លាប់ត្រូវ Arsenal ដាក់ឲ្យក្លិប RB Leipzig និង Huddersfield ខ្ចីជើង ប៉ុន្តែពេលមកលេងនៅទឹកដី Emirates វិញ គេរកបាន៤គ្រាប់ក្នុងការបង្ហាញខ្លួនសរុប៣៣ប្រកួតនៅរដូវកាលមុន៕
ប្រភព៖ mirror