ហេតុអ្វីបានជាមានវ៉ារ្យ៉ង់កូវីដ-19 ជាច្រើនចេះតែលេចឡើងមិនឈប់?

បរទេស៖ វីរុស SARS-CoV-2 បានបម្លែងខ្លួនឥតឈប់ឈរ ចាប់តាំងពីការចាប់ផ្តើមនៃជំងីរាតត្បាតលើកនេះមក។ តែរហូតមកដល់ខែវិច្ឆិកា ឆ្នាំ2020 គឺជាពេលដែលអ្នកវិទ្យាសាស្ត្រនៅចក្រភពអង់គ្លេសបានកត់សម្គាល់ឃើញថាការបម្លែងខ្លួនរបស់វាគឺគួរឱ្យព្រួយបារម្ភ ដោយសារវីរុសនេះបានបម្លែងខ្លួនធ្វើឱ្យខ្លួនវាអាចឆ្លងបានកាន់តែលឿនជាងមុនទៅទៀត។ ក្នុងរយៈពេលមួយខែ របាយការណ៍ស្រដៀងគ្នានេះបានលេចឡើងពីកន្លែងដទៃទៀតនៅជុំវិញពិភពលោក។

ក្នុងរយៈពេលដ៏ខ្លី វីរុសនេះហាក់ដូចជាបម្លែងខ្លួនលឿនមែនទែន ដែលជាអត្រាប្រកាសអាសន្នមួយ។

ការពិតទៅវីរុស SARS-CoV-2 បម្លែងខ្លួនបានលឿនដូច្នេះ គឺដោយសារតែវាបានរីករាលដាលពាសពេញពិភពលោកដែលធ្វើឱ្យវាមានឱកាសកាន់តែច្រើនដើម្បីបម្លែងខ្លួន ស្របពេលដែលវាកំពុងចម្លង។ បន្ទាប់ពីការបម្លែងខ្លួនជារឿយៗរាប់មិនអស់មក វីរុសនេះស្រាប់តែចាប់ផ្តើមសម្របខ្លួនទៅនឹងប្រព័ន្ធការពាររបស់មនុស្ស។ ហើយដោយសារតែវាជារឿងធម្មតាទៅហើយដែលវីរុសអាចបម្លែងខ្លួន គេមិនរំពឹងថាវានឹងឈប់នោះទេ។

មធ្យោបាយពិតប្រាកដតែមួយគត់ដើម្បីបញ្ឈប់ការបម្លែងខ្លួនទាំងនេះ គឺបញ្ឈប់ឱកាសនូវការឆ្លង។

មកមើលវីដេអូខាងក្រោម ដែលនិយាយលម្អិតពីការបម្លែងខ្លួនរបស់វីរុសនេះ៕