ផ្លូវការ! តារាជួរមុខរបស់ Real Madrid រូបនេះនឹងចាកចេញពីក្លិប

អេស្ប៉ាញ៖ ក្លិបអធិរាជស Real Madrid បានប្រកាសជាផ្លូវការថាខ្សែការពារ Sergio Ramos នឹងចាកចេញពីក្លិបនៅរដូវក្ដៅនេះដោយគ្មានតម្លៃខ្លួន បន្ទាប់ពីចំណាយពេល១៦ឆ្នាំនៅទឹកដី Santiago Bernabeu ។

ប្រធានក្រុមរូបនេះអស់សុពុលភាពកុងត្រាជាមួយក្លិបនៅចុងខែមិថុនានេះហើយ ដោយមិនមានការបន្តកុងត្រាថ្មីទេ បើទោះបីជាកន្លងមក Real Madrid បានស្នើកុងត្រាថ្មីដល់កីឡាករសញ្ជាតិអេស្ប៉ាញរូបនេះចំនួន១ឆ្នាំអមជាមួយការកាត់ប្រាក់ឈ្នួល១០ភាគរយក៏ដោយខណៈដែល Ramos ទាមទារកុងត្រាចំនួន២ឆ្នាំ។

ក្លិប Real Madrid បានចេញមកបញ្ជាក់ជាផ្លូវការថាពួកគេបានសម្រេចចែកផ្លូវជាមួយ Ramos ហើយដោយនឹងមានរៀបចំពិធីលាជាផ្លូវការនៅថ្ងៃព្រហស្បត្តិ៍មុនគេចាកចេញស្របពេលក្លិបអាចប្រឈមមុខនឹងការបាត់បង់ ខ្សែការពារ Raphael Varane ម្នាក់ទៀត។

Sergio Ramos បានចូលលេងដល់ទៅ៦៧១ប្រកួត និងរកបាន១០១គ្រាប់ ក្រោយផ្ទេរពី Sevilla មក Real Madrid ក្នុងឆ្នាំ២០០៥ ដោយគេបានដឹកនាំក្រុមឈ្នះពាន La Liga ៥ដង,Champions League ៤ដង និង Copa Del Rey ២ដង ឯសម្រាប់ជម្រើសជាតិអេស្ប៉ាញវិញគឺគេបានបង្ហាញខ្លួនដល់ទៅ១៨០ប្រកួត ក្លាយជាកីឡាករដែលលេងឲ្យជម្រើសជាតិអេស្ប៉ាញបានច្រើនបំផុតក្នុងប្រវត្តិសាស្ត្រ។

យ៉ាងណាមិញគេមិនទាន់ដឹងនៅឡើយទេថា  Ramos សម្រេចទៅចូលរួមជាមួយក្លិបណាបន្តទៀតប៉ុន្តែកន្លងមកមានក្លិប Manchester United,Manchester City និង Paris Saint-Germain ចាប់អារម្មណ៍លើរូបគេ ស្របពេល Real Madrid មានខ្សែការពារមកជំនួសកីឡាករវ័យ៣៤ឆ្នាំនេះហើយគឺ ខ្សែការពារ David Alaba ដែលផ្ទេរមកដោយគ្មានតម្លៃខ្លួនពី Bayern Munich ៕

ប្រភព៖ thesun