មកមើលការផ្គុំរ៉ុក្កែតយក្សរបស់ណាសា ដែលនឹងដឹកមនុស្សទៅឋានព្រះចន្ទ នៅពេលខាងមុខ

បរទេស៖ ណាសាបានផ្គុំប្រព័ន្ធរ៉ុក្កែត Space Launch System (SLS) ដែលមានអនុភាពដំបូងបង្អស់របស់ខ្លួន ដែលនឹងដឹកមនុស្សទៅឋានព្រះចន្ទក្នុងទសវត្សរ៍នេះ។ កាលពីថ្ងៃសុក្រ ក្រុមវិស្វករនៅមជ្ឈមណ្ឌលអវកាស Kennedy Space Center នៅរដ្ឋផ្លរីដា បានបញ្ចប់ដំណាក់កាលការដាក់ចំណុចសំខាន់កម្ពស់៦៥ម៉ែត្រ នៅចន្លោះរវាងគ្រឿងបង្កើនចរន្តចំនួនពីរនៃរ៉ុក្កែត។ ​ នេះជាលើកទីមួយហើយដែលធាតុផ្សំសំខាន់ទាំងបីរបស់រ៉ុក្កែត បានផ្ដុំគ្នានៅក្នុងការកំណត់រចនាសម្ព័ន្ធនៃការបាញ់បង្ហោះរបស់វា។

ណាសាគ្រោងបាញ់បង្ហោះប្រព័ន្ធរ៉ុក្កែត SLS នៅលើជើងហោះហើរដំបូងរបស់ខ្លួន នៅចុងឆ្នាំនេះ។ ក្នុងអំឡុងពេលបេសកកម្មនេះ ដែលគេឲ្យឈ្មោះថា Artemis-1 ប្រព័ន្ធរ៉ុក្កែត SLS នឹងដឹកយានអវកាស Orion ដែលជាយានដឹកមនុស្សជំនាន់ចុងក្រោយរបស់អាមេរិក ទៅកាន់ឋានព្រះចន្ទ។ ទោះជាយ៉ាងណា មិនទាន់មានអវកាសយានិកណាម្នាក់ស្ថិតនៅក្នុងការហោះហើរនេះទេ ហើយក្រុមវិស្វករចង់សាកល្បងទាំងរ៉ុក្កែតនិងយានអវកាស នៅតាមដំណាក់កាល មុនពេលមនុស្សត្រូវបានអនុញ្ញាតនៅក្នុងឆ្នាំ២០២៣។

ប្រព័ន្ធរ៉ុក្កែត SLS មានដំណាក់កាលសំខាន់ធំៗ ដែលផ្ទុកធុងជំរុញថាមពលនិងម៉ាស៊ីនកម្លាំងខ្លាំងចំនួនបួន អមដោយកម្លាំងរុញរ៉ុក្កែត (SRBs) ប្រវែង៥៤ម៉ែត្រ។ ពួកវានឹងផ្ដល់កម្លាំងរុញច្រាន ដែលអាចជួយរុញប្រព័ន្ធរ៉ុក្កែត SLS ផុតពីដី ក្នុងរយៈពេលពីរបីនាទីដំបូងនៃការហោះហើរ។ ការសាងសង់នេះបច្ចុប្បន្នស្ថិតនៅក្នុងអាគារ Vehicle Assembly Building (VAB)៕