មិនធម្មតា! ប្រទេសក្នុងតំបន់អាស៊ានមួយនេះ រកឃើញអ្នកឆ្លងកូវីដ-១៩ជិត ៩ពាន់នាក់ក្នុងមួយថ្ងៃ ខណៈព្រួយបារម្ភវីរុសបំប្លែងខ្លួនថ្មី

ឥណ្ឌូណេស៊ី៖ កាលពីថ្ងៃទី១០ ខែមិថុនា ឆ្នាំ២០២១ ប្រទេសឥណ្ឌណេស៊ីបានរាយការណ៍ថាបានរកឃើញអ្នកឆ្លងជំងឺកូវីដ-១៩ថ្មី ដល់ទៅចំនួន ៨,៨៩២នាក់ ដែលជាចំនួនឆ្លងប្រចាំថ្ងៃខ្ពស់បំផុតបើគិតចាប់ពីថ្ងៃ២៣ ខែកុម្ភៈមក ខណៈអ្នកជំងឺចំនួន ២១១នាក់បន្ថែមទៀតបានស្លាប់បាត់បង់ជីវិត។

ករណីឆ្លងបានកើនឡើងនៅលើកោះចំនួន២ រួមមានកោះជ្វា (Java) និងកោះស៊ូម៉ាត្រា (Sumatra) ដែលមានប្រជាជនរស់នៅច្រើនបំផុត ស្របពេលអ្នកជំនាញខាងផ្នែកសុខាភិបាលបារម្ភថា ការឆ្លងដ៏អាក្រក់បំផុតមិនទាន់មកដល់នៅឡើយទេ។ ហើយចំនួនករណីឆ្លងបានកើនឡើងយ៉ាងខ្លាំងនៅកោះទាំង២ គឺ នៅរយៈពេល ៣សប្ដាហ៍បន្ទាប់ពីថ្ងៃឈប់សម្រាក ក្រោយពិធីបុណ្យសាសនា Ramadan ពោលគឺនៅពេលមនុស្សរាប់លាននាក់ធ្វើដំណើរឆ្លងកាត់ប្រជុំកោះ ដោយមិនអើពើនឹងបម្រាមនានា។

ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស

ជាមួយគ្នានេះ លោក Wildan Asfan Hasibuan អ្នកជំនាញផ្នែករោគរាតត្បាត និងជាទីប្រឹក្សាក្រុមការងារខេត្ដបានឲ្យដឹងដែរថា ខេត្ដ Riau ដែលស្ថិតនៅលើកោះស៊ូម៉ាត្រា បានកើនឡើងករណីឆ្លងប្រចាំថ្ងៃទ្វេដងឯណោះ។

តួយ៉ាងគិតត្រឹមលទ្ធផលថ្ងៃម្សិលមិញ ប្រទេសស្ថិតក្នុងតំបន់អាស៊ានមួយនេះ បានកើនឡើងករណីឆ្លងសរុបដល់ជាង ១.៩លានករណី និងស្លាប់ចំនួន ៥២,៣៧៣នាក់ហើយ៕

ប្រភព៖: CNA