បរទេស៖ ដោយមានទីតាំងស្ថិតនៅក្នុងគន្លងគោចរចន្លោះភពអង្គារនិងព្រហស្បតិ៍ អាចម៍ផ្កាយ 16 Psyche មិនមែនជាអាចម៍ផ្កាយធម្មតា ដែលបង្កើតឡើងដោយថ្មឬទឹកកកនៅតាមផ្នែកមួយចំនួននោះទេ ប៉ុន្តែវាបង្កើតឡើងដោយលោហធាតុ។ អាចម៍ផ្កាយ Psyche ថែមទាំងមានផ្ទុកទៅដោយផ្លាកទីន ដែក និងនីកែលយ៉ាងច្រើន។ អ្នកជំនាញបានប៉ាន់ប្រមាណថា លោហធាតុដែលវាបានផ្ទុក គឺមានតម្លៃរហូតដល់ ១០,០០០ក្វាទី្រលានដុល្លារ ($10,000,000,000,000,000,000)។

ប្រសិនបើទ្រព្យសម្បត្តិនៅលើអាចម៍ផ្កាយ Psyche ត្រូវបានដឹកមកកាន់ផែនដី វានឹងក្លាយជាអាវុធមុខពីរ ព្រោះតម្លៃដ៏មហាសាលរបស់វានឹងជួយឲ្យមនុស្សគ្រប់គ្នាមួយផែនដីក្លាយជាមហាសេដ្ឋី ប៉ុន្តែវាក៏អាចធ្វើឲ្យសេដ្ឋកិច្ចរបស់ពិភពលោក ដែលមានតម្លៃយ៉ាងហោចណាស់៧៥.៥ទ្រីលានដុល្លារ បាត់លំនឹងឬដួលរលំក៏ថាបាន។

ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស

អាចម៍ផ្កាយ Psyche គឺជាវត្ថុធាតុធំបំផុតនៅក្នុងតំបន់ខ្សែប្រវាត់អាចម៍ផ្កាយនៅក្នុងប្រព័ន្ធព្រះអាទិត្យរបស់យើង ហើយវាមានមុខកាត់ប្រហែល ២២៥គីឡូម៉ែត្រ។ អាចម៍ផ្កាយមួយនេះចំណាយពេលប្រហែល៥ឆ្នាំនៃផែនដី ដើម្បីគោចរមួយជុំវិញព្រះអាទិត្យ ប៉ុន្តែវាចំណាយពេលវិលជុំវិញខ្លួនឯង (រង្វិលខ្ញាល់) ជាង៤ម៉ោង។ នៅរដូវក្ដៅឆ្នាំ២០២២ អង្គការណាសាមានគម្រោងបញ្ចេញបេសកកម្ម ទៅអង្កេតមើលអាចម៍ផ្កាយមួយនេះ ហើយស្វែងយល់បន្ថែមអំពីទ្រព្យសម្បត្តិដ៏មហាសាលរបស់វា។

បេសកកម្មមួយនោះត្រូវបានគេហៅថា Discovery Mission ដែលនឹងកំណត់ថាទៅដល់អាចម៍ផ្កាយ 16 Psyche នៅរយៈពេល៤ឆ្នាំទៀត នៅឆ្នាំ២០២៦ និងបានជំនួយពីការរុញយានឲ្យទៅមុខដោយទំនាញរបស់ភពអង្គារនៅឆ្នាំ២០២៣ ឆ្ពោះទៅកាន់គោលដៅរបស់វា។ អ្នកវិទ្យាសាស្ត្រជឿជាក់ថា អាចម៍ផ្កាយ Psyche អាចជាស្នូលលោហធាតុនៃភពដើមមួយ ដែលបានខ្ទាតចេញដោយសារតែការបុកទង្គិចគ្នានឹងអ្វីមួយ ដែលកើតមានមុនពេលកំណើតប្រព័ន្ធព្រះអាទិត្យទៅទៀត៕

រូបតំណាងបេសកកម្មទៅកាន់អាចម៍ផ្កាយ Psyche
អាចម៍ផ្កាយ Psyche
រូបតំណាងបេសកកម្មទៅកាន់អាចម៍ផ្កាយ Psyche

បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected] (3) LINE, VIBER: 098282890 (4) តាមរយៈទំព័រហ្វេសប៊ុកខ្មែរឡូត https://www.facebook.com/khmerload

ចូលចិត្តផ្នែក បច្ចេកវិទ្យា និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]