ហ្វេសប៊ុកត្រៀមបញ្ចេញនាឡិកា smartwatch មានកាមេរ៉ាពីរ របស់ខ្លួនដំបូងនៅឆ្នាំក្រោយ

បរទេស៖ Facebook ត្រៀមបញ្ចេញនាឡិកា smartwatch ដំបូងរបស់ខ្លួន ហើយទោះបីជាក្រុមហ៊ុនមិនបានបញ្ជាក់ជាសាធារណៈមែន តែខ្លួនមានគម្រោងនឹងបង្ហាញវានៅរដូវក្តៅឆ្នាំក្រោយ។ វេបសាយ The Verge បានឱ្យដឹងថា ឧបករណ៍នេះនឹងមានបំពាក់កាមេរ៉ាពីរ ដែលអាចផ្តាច់ចេញពីនាឡិកាបានដើម្បីថតរូបនិងវីដេអូ ហើយចែករំលែកវានៅលើ Facebook រួមទាំង Instagram ផងដែរ។

កាមេរ៉ាផ្នែកខាងមុខនៃនាឡិកា មានមុខងារជាចម្បងសម្រាប់ video calling ខណៈដែលកាមេរ៉ាថត 1080p នៅខាងក្រោយគឺប្រើសម្រាប់ចាប់យករូបភាពនានា។

យោងតាមប្រភពមិនបញ្ចេញឈ្មោះដែលបានដឹងពីគម្រោងនេះបានឱ្យដឹងថា ក្រុមហ៊ុន Facebook កំពុងតែជ្រើសរើសក្រុមហ៊ុនផ្សេងទៀតដើម្បីបង្កើតគ្រឿងបន្លាស់សម្រាប់ភ្ជាប់កាមេរ៉ាទៅនឹងវត្ថុដទៃទៀត ដូចជាកាបូបស្ពាយជាដើម។

Facebook ក៏កំពុងធ្វើការជាមួយក្រុមហ៊ុន wireless កំពូលៗនៅសហរដ្ឋអាមេរិក ដើម្បីគាំទ្រការភ្ជាប់បណ្តាញ LTE នៅលើនាឡិកា មានន័យថាវាមិនចាំបាច់ភ្ជាប់ជាមួយទូរសព្ទដើម្បីប្រើបាននោះទេ។ នាឡិកានេះនឹងមានពណ៌ស ខ្មៅ និងមាស។

Facebook មានគម្រោងបញ្ចេញនាឡិកាជំនាន់ដំបូងនៅរដូវក្តៅឆ្នាំ2022។ តម្លៃឧបករណ៍នេះ ប្រហែលជាអាចមានតម្លៃ 400ដុល្លារ ប៉ុន្តែតម្លៃអាចផ្លាស់ប្តូរក៏ថាបាន៕