ផ្លូវការ! កីឡាករកម្រិតអន្តរជាតិរបស់ហូឡង់ Van de Beek បានដកខ្លួនចេញពីការប្រកួតព្រឹត្តិការណ៍ Euro ២០២០

ហូឡង់៖ កីឡាករ Donny van de Beek នឹងខកខានការប្រកួតក្នុងព្រឹត្តិការណ៍ Euro ២០២០ ដោយសារបញ្ហារបួស ហើយរូបគេបានចាកចេញពីជំរុំហ្វឹកហាត់របស់ក្រុមជម្រើសជាតិហូឡង់កាលពីអង្គារម្សិលម៉ិញនេះ។

ដោយសារតែរបួសរបស់គាត់ Van de Beek នឹងមិនសាកសមជាមួយនឹងពេលវេលាដើម្បីទៅប្រកួតពានរង្វាន់អឺរ៉ុបដែលនឹងចាប់ផ្តើមសម្រាប់ប្រទេសហូឡង់នៅថ្ងៃទី ១៣ ខែមិថុនាតទល់នឹងប្រទេសអ៊ុយក្រែននៅទីក្រុងអាំស្ទែដាំនោះទេ។

គ្រូបង្វឹកក្រុមជម្រើសជាតិហូឡង់លោក Frank de Boer មិនបានកោះហៅកីឡាករជំនួសនោះទេ ហើយនឹងបន្តដោយមានតែកីឡាករ ២៥ នាក់ ។

កីឡាករ Van de Beek មិនបានលេងឱ្យក្រុមជម្រើសជាតិហូឡង់ (Oranje) ក្នុងការប្រកួតមិត្តភាពចុងក្រោយជាមួយប្រទេសស្កុតឡែនក្នុងលទ្ធផល ២-២ និងប្រទេសហ្សកហ្ស៊ីដោយឈ្នះ ៣-០ ។

អវត្តមានរបស់កីឡាកររូបនេះនៅក្នុងព្រឹត្តិការណ៍ Euro ២០២០ មានន័យថាជាការបញ្ចប់រដូវកាលដ៏ខកចិត្តបំផុត ។ បន្ទាប់ពីការផ្ទេររបស់គាត់ពីក្លិប Ajax ទៅកាន់ក្លិប Manchester United កាលពីឆ្នាំមុន នាំឲ្យគាត់បានបរាជ័យក្នុងការទាក់ទាញចំណាប់អារម្មណ៍និងស្ទើរតែមិនសូវបានលេងឱ្យក្លិបអង់គ្លេស៕

ប្រភព៖ Xinhua Sport