បរទេស៖ អ្នកចាត់ការទូទៅល្បីឈ្មោះសញ្ជាតិព័រទុយហ្គាល់ លោក Jose Mourinho បានបង្ហាញទស្សនៈផ្ទាល់ខ្លួនពាក់ព័ន្ធនឹងព្រឹត្តិការណ៍ UEFA Euro ដែលនឹងឈានមកដល់នាប៉ុន្មានថ្ងៃខាងមុខនេះ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស
ក្នុងកិច្ចសម្ភាសន៍នាពេលកន្លងទៅថ្មីៗ ជាមួយខាងកាសែត Sky Sport បុរសកំពុងត្រៀមខ្លួនទៅដឹកនាំក្លិប AS Roma រូបនេះបានពោលយ៉ាងដូច្នេះ៖
ខ្ញុំមានការជឿជាក់ថា អង់គ្លេសអាចនឹងឈ្នះពាន UEFA Euro ឆ្នាំនេះ។ ដូច្នេះអ្នកគាំទ្រ (សម្តៅអ្នកគាំទ្រជម្រើសជាតិអង់គ្លេស) ពួកគេត្រូវតែជឿជាក់ និងអបអរសាទរផងដែរ។ ខ្ញុំទទួលស្គាល់ថាការដឹកនាំក្រុមជម្រើសជាតិអង់គ្លេស គឺពិតជាមានសម្ពាធដូចការដឹកនាំក្រុមជម្រើសជាតិប្រេស៊ីល ពីព្រោះក្រុមជម្រើសជាតិទាំងទ្វេគឺមានអ្នកគាំទ្រ ដែលតែងតែរំពឹងថានឹងជោគជ័យខ្ពស់។
បន្ថែមពីការលើកឡើងដូចខាងលើ អតីតអ្នកចាត់ការទូទៅជោគជ័យនៅ Chelsea, Manchester United រូបនេះបានបន្តថា៖
ខ្ញុំក៏ជ្រើសរើសបារាំង ពីព្រោះពួកគេមានកីឡាករដ៏ល្អជាច្រើន ដែលលេងបានស្ទើរគ្រប់ឈុតមិនថា ឈុត A, B ឬឈុត C។ ខ្ញុំមើលមិនឃើញនូវចំណុចខ្សោយណាមួយរបស់ពួកគេឡើយ។ បារាំងគួរតែជាម្ចាស់ជើងឯកក្នុងព្រឹត្តិការណ៍នេះ បើមិនអ៊ីចឹងទេ វាប្រកដជាឆ្នាំមួយដែលបរាជ័យសម្រាប់ពួកគេ។
គួរបញ្ជាក់ផងថា ព្រឹត្តិការណ៍ពានរង្វាន់ជើងឯកកម្រិតទ្វីបអឺរ៉ុបខាងលើនឹងចាប់ផ្តើមពីថ្ងៃទី១១ ខែមិថុនា ដល់ថ្ងៃទី១១ ខែកក្កដា ឆ្នាំ ២០២១ ដោយមាន ១២ ប្រទេសជាសហម្ចាស់ផ្ទះរួម៕
Bong I.T