ទីបំផុតគេអាចប្រើ Siri បាន ដោយមិនចាំបាច់មានអ៊ីនធើណេតទៀតឡើយ នៅលើ iOS 15

បរទេស៖ ជំនួយការឌីជីថលរបស់ Apple គឺ Siri នឹងដំណើរការដោយ audio on-device នៅលើឧបករណ៍ប្រើប្រព័ន្ធ iOS 15 ពោលគឺមានន័យថា អ្នកនឹងអាចប្រើប្រាស់មុខងារនេះបានដោយគ្មានការភ្ជាប់អ៊ីនធើណេត។ Apple និយាយថាការអាប់ឌែតនេះក៏នឹងធ្វើឱ្យ Siri លឿនជាងមុនផងដែរ។

Apple និយាយថា ដំណើរការ audio on-device នៅលើឧបករណ៍ នឹងធ្វើអោយការប្រើប្រាស់ Siri កាន់តែមានលក្ខណៈឯកជន។ 

ប៉ុន្តែប្រសិនបើអ្នកមិនមានអ៊ីនធើណេតទេ នោះអ្នកក៏នឹងមិនអាចប្រើ Siri ឱ្យធ្វើកិច្ចការមួយចំនួនផងដែរ ដូចជាការស្វែងរកលើគេហទំព័រជាដើមដែលត្រូវការអ៊ីនធើណេតជាចាំបាច់។ ប៉ុន្តែអ្នកអាចប្រើ Siri ដោយមិនមានអ៊ីនធើណេតសម្រាប់កិច្ចការធម្មតាៗដូចជា បញ្ជាតន្ត្រី, បើកកម្មវិធី, កំណត់ timers និងអ្វីផ្សេងទៀតជាដើម។ វានឹងមានភាពងាយស្រួលជាងមុន ដែលអ្នកអាចបញ្ជាកិច្ចការទាំងនេះពេលនៅ offline។

ទោះយ៉ាងណា មុខងារនេះអាចប្រើបានតែលើ iPhone និង iPad ដែលមានបន្ទះឈីប A12 Bionic ឬក្រោយៗទៀតតែប៉ុណ្ណោះ។ នោះមានន័យថា វានឹងអាចប្រើបាននៅលើ iPhone XS, XS Max, និង XR; iPhone 11, 11 Pro, 11 Pro Max, និង iPhone SE (ជំនាន់ទី2); iPhone 12, 12 Mini, 12 Pro, និង 12 Pro Max; iPad Mini (ជំនាន់ទី5); iPad Air (ជំនាន់ទី3 និងទី4); និងi Pad (ជំនាន់ទី8)។ ចំណែកឯ Apple Watch គឺមិនអាចប្រើបានទេ៕