ចិន៖ តាមការរាយការណ៍បានឱ្យដឹងថា ក្រុមអ្នកស្រាវជ្រាវផ្នែកវេជ្ជសាស្ត្រនៃកងទ័ពចិន បានបង្កើតសត្វកណ្តុរដែលមានសួតមនុស្សនៅឆ្នាំ2019 ដើម្បីធ្វើតេស្តមេរោគលើពួកវា នេះបើតាមការចេញផ្សាយរបស់ Daily Mail។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សសារព័ត៌មាន Vanity Fair បានបង្ហាញថា សត្វកណ្តុរដែលត្រូវបានបង្កើតឡើងដោយប្រើបច្ចេកវិទ្យាកែសម្រួលហ្សែន CRISPR ត្រូវបានគេលើកឡើងនៅក្នុងការសិក្សាកាលពីខែមេសាឆ្នាំ2020 ដែលបានស្រាវជ្រាវពីភាពងាយរងគ្រោះរបស់ពួកវាពីការវាយប្រហាររបស់វីរុស SARS-CoV-2 ដែលជាវីរុសបង្កឱ្យមានជំងឺ COVID-19។
នៅក្នុងចំណោមអ្នកស្រាវជា្រវ23នាក់របស់ការសិក្សានេះ មាន11នាក់ធ្វើការឱ្យបណ្ឌិត្យសភាវិទ្យាសាស្ត្រយោធា (Academy of Military Medical Sciences) ដែលជាវិទ្យាស្ថានស្រាវជ្រាវវេជ្ជសាស្ត្រសម្រាប់កងទ័ពចិន។
ក្រុមអ្នកស៊ើបអង្កេតនៃក្រុមប្រឹក្សាសន្តិសុខជាតិសហរដ្ឋអាមេរិក ដែលបានស្រាវជ្រាវពីប្រភពដើមនៃជំងឺរាតត្បាតបានកំណត់ថា សត្វកណ្តុរនៅក្នុងការសិក្សាត្រូវបានបង្កើតឡើងនៅរដូវក្តៅឆ្នាំ2019 ពោលគឺប៉ុន្មានខែមុនការកើតមានជំងឺរាតត្បាតនេះ។
អ្នកស៊ើបអង្កេតក្រុមប្រឹក្សាសន្តិសុខជាតិក៏បានរាយការណ៍ផងដែរថា ពួកគេបានរកឃើញភស្តុតាងសំខាន់ៗដែលគាំទ្រទ្រឹស្តីដែលថា COVID-19 បានកើតចេញពីបន្ទប់ពិសោធន៍ នេះបើយោងតាមសារព័ត៌មាន Vanity Fair។
ប្រភពដដែលក៏បានឱ្យដឹងទៀតថា លោកស្រី Shi Zhengli ដែលជាអ្នកដឹកនាំការស្រាវជ្រាវនៃវិទ្យាស្ថាន Wuhan Institute of Virology ទៅលើវីរុសកូរ៉ូណា ហើយមានរហស្សនាមថា "Bat Woman" ហាក់ដូចជាបានធ្វើតេស្តវីរុសកូរ៉ូណាថ្មីពីរប្រភេទ (novel coronaviruses) ទៅលើសត្វកណ្តុរសួតមនុស្ស ក្នុងរយៈពេល3ឆ្នាំចុងក្រោយនេះ។
លោកស្រី Shi បានបដិសេធការអះអាងដែលថា COVID-19 បានកើតចេញពីមន្ទីរពិសោធន៍នៅវិទ្យាស្ថាន Wuhan Institute of Virology និងបដិសេធថាបានធ្វើការស្រាវជ្រាវឱ្យផ្នែកយោធា៕