ឆ្ងល់ទេ? មួយរយៈនេះ ឃើញពន្លឺមួយដួងភ្លឺខ្លាំង នៅទិសខាងលិចពេលល្ងាច ការពិតគឺជាផ្កាយចោរសោះ

កម្ពុជា៖ បើសិនជាអ្នកឧស្សាហ៍ក្រឡេកមើលទៅទិសខាងលិច (ឆៀងខាងជើងបន្តិច) បន្ទាប់ពីព្រះអាទិត្យអស្ដង្គត នោះអ្នកនឹងចាប់ផ្ដើមឃើញពន្លឺផ្កាយមួយដួង ដែលបញ្ចេញពន្លឺខ្លាំងដាច់គេតែម្ដង ហើយនោះគឺជាផ្កាយចោរ។ វាជាឱកាសដ៏ល្អ ក្នុងរយៈពេលនេះ សម្រាប់មនុស្យនៅលើពិភពលោកទាំងមូល ដើម្បីគយគន់ពន្លឺដ៏ខ្លាំងនៃផ្កាយមួយដួងនេះ នាពេលល្ងាច។

ភពសុក្រឬផ្កាយចោរគឺជាអង្គទីពីរ ដែលមានពន្លឺខ្លាំងជាងគេ នៅលើផ្ទៃមេឃពេលល្ងាច បន្ទាប់ពីពន្លឺព្រះចន្ទ ហើយយើងក៏មិនអាចមើលឃើញវារាល់ពេល ពេញមួយឆ្នាំដែរ បើមិនចំគន្លងគោចរបង្ហាញខ្លួនរបស់វា។ ប្រសិនជាផ្ទៃមេឃមានភាពស្រឡះ ផ្កាយចោរនឹងរះឲ្យយើងឃើញ ជាមួយពន្លឺងាយនឹងធ្វើឲ្យយើងចាប់អារម្មណ៍ នៅពេលល្ងាច។ វានឹងបង្ហាញខ្លួនកាន់តែច្បាស់ ៣០នាទីបន្ទាប់ពីព្រះអាទិត្យអស្ដង្គត ហើយផ្កាយចោរនេះនឹងលិចបាត់ទៅវិញនៅប្រហែលម៉ោង១៩:៣០។

ពួកយើងមិនចាំបាច់មានឧបករណ៍ជំនួយ ដូចជាកែវយឹតនិងតេឡេទស្សន៍ទេ ព្រោះពន្លឺរបស់ផ្កាយចោរគឺគ្រប់គ្រាន់ សម្រាប់ឲ្យយើងមើលឃើញដោយភ្នែកទទេ។ តែប្រសិនបើគេឆ្លុះមើលផ្កាយចោរ តាមរយៈតេឡេទស្សន៍វិញ គេនឹងឃើញវាមានរាងត្រឹមមួយចំណិត ដោយសារតែទីតាំងរបស់វាស្ថិតនៅចន្លោះព្រះអាទិត្យនិងផែនដី។ បន្ថែមពីនេះ យើងអាចមើលពន្លឺរបស់វាត្រឹមតែ២៥ភាគរយប៉ុណ្ណោះ ប៉ុន្តែវានៅតែរះជាមួយដ៏ភ្លឺច្បាស់ខ្លាំង នៅលើមេឃ៕