អ្នកវិជ្ជមានកូវីដ-១៩ម្នាក់ នៅស្រុកស្វាយជ្រំ ព្យាយាមរត់គេចពីតំបន់រោងចក្រយូលី ទៅផ្ទះ តែត្រូវបានសមត្ថកិច្ចតាមឃាត់ទាន់ពេល

ខេត្តស្វាយរៀង៖ យោងតាមបញ្ជាក់របស់ អភិបាលរងស្រុកស្វាយជ្រំនៅលើគណនីហ្វេសប៊ុក លោកស្រី ហួត ចាន់បូរ៉ា បានឱ្យបញ្ជាក់ឱ្យដឹងថា មានជនដែលមានវិជ្ជមានវីរុសកូវីវីដ-១៩ម្នាក់ បានព្យាយាមរត់គេច ពីតំបន់រោងចក្រយូលី ដើម្បីត្រឡប់ទៅផ្ទះ នៅស្រុកស្វាយជ្រំ តែជាសំណាងល្អ ត្រូវបានសមត្ថកិច្ច សហការជាមួយអាជ្ញាធរមូលដ្ឋាន ចុះឃាត់ខ្លួនទាន់ពេល។ ដោយជនដែលវិជ្ជមានកូវីដ១៩ ដែលប៉ុនប៉ងព្យាយាមរត់គេច ត្រូវបានឃាត់ខ្លួន​ នៅចំណុចទួលគជ់ វាលស្រែ ស្ថិតនៅភូមិអង្គប្បាស ឃុំគោកព្រីង ស្រុកស្វាយជ្រំ ខេត្តស្វាសរៀង នៅម៉ោង៤ ៖ ០៩នាទីរសៀល នៅថ្ងៃទី២៧ ខែឧសភា ឆ្នាំ២០២១។

ជាមួយគ្នានោះដែរ លោកស្រី ហួត ចាន់បូរ៉ា ក៏បានអំពាវនាវដល់បងប្អូន ប្រជាពលរដ្ឋប្រសិនបើមានរោគសញ្ញាដូចជា៖ គ្រុនក្ដៅ, ក្អក, កណ្ដាស់, ឈឺបំពង់ក ឬដកដង្ហើមខ្លីៗ ឬ សង្ស័យ សូមមេត្តាប្រញាប់ ទៅធ្វើតេស្តរកមេរោគកូវីដ-១៩ ដែលមានទីតាំងនៅជិតផ្ទះ ឬផ្ដល់ព័ត៌មានទៅអាជ្ញាធរមូលដ្ឋាន សម្រាប់អ្នកដែលគ្មានរោគសញ្ញា សូមដាក់ខ្លួនដាច់ដោយឡែក និងតាមដានសុខភាពរបស់ខ្លួនរយៈពេល ១៤ ថ្ងៃ ចាប់ពីថ្ងៃដែលអ្នកបានប៉ះពាល់ ឬទៅទីកន្លែងនោះ ៕