អស់ទាស់! ក្រុមហ៊ុន GM ប្រកាសផលិតឡាន សម្រាប់ជិះនៅឋានព្រះចន្ទ

បរទេស៖ ក្រុមហ៊ុន General Motors (GM) ចង់ពង្រីកយានយន្តអគ្គិសនីរបស់ខ្លួន ទៅក្រៅពីផែនដីនេះទៀត។ ដោយរួមគ្នាជាមួយក្រុមហ៊ុន Lockheed Martin ក្រុមហ៊ុន GM គ្រោងនឹងបង្កើតយានដើរដោយថាមពលអគ្គីសនីសម្រាប់ណាសា ដើម្បីឱ្យអវកាសយានិកបេសកម្ម Artemis បើករុករកលើឋានព្រះចន្ទ។

ក្រុមហ៊ុន GM មិនមែនទើបតែចាប់អភិវឌ្ឍបច្ចេកវិទ្យាយានយន្តសម្រាប់ឋានព្រះចន្ទនោះទេ។ ក្រុមហ៊ុនផលិតរថយន្តនេះ កាលពីមុនបានបង្កើតប្រព័ន្ធរុករកសម្រាប់កម្មវិធីអាប៉ូឡូទាំងមូល រួមទាំងការចុះចតនៅទឹកកាលពីឆ្នាំ1969ផងដែរ។ លើសពីនេះទៀត ក្រុមហ៊ុន GM បានជួយអភិវឌ្ឍយានយន្តអគ្គិសនី Lunar Roving Vehicle (LRV) ដែលត្រូវបានប្រើចាប់ពីបេសកកម្មអាប៉ូឡូ15ដល់17ទៀតផង។

ក្រុមហ៊ុន Lockheed Martin ក៏ជាក្រុមហ៊ុនអាកាសចរណ៍និងបច្ចេកវិទ្យាដ៏ធំមួយផងដែរ។ ទោះបីជាភាគច្រើនក្រុមហ៊ុននេះបានសហការជាមួយក្រសួងការពារជាតិសហរដ្ឋអាមេរិកក៏ដោយ ក៏អង្គការណាសានៅតែជាភ្ញៀវដ៏ធំមួយរបស់ខ្លួនផងដែរ។

បេសកកម្មដំបូងនៃកម្មវិធីអាតេមីស នឹងចាប់ផ្តើមនៅឆ្នាំ2024 ហើយទាំងក្រុមហ៊ុន GM និងក្រុមហ៊ុន Lockheed Martin គ្រោងនឹងប្រើប្រាស់បទពិសោធន៍ពីមុនរបស់ខ្លួន ដើម្បីផលិតយានដល់អវកាសយានិក ឱ្យជិះរុករកលើឋានព្រះចន្ទ ឱ្យកាន់តែជ្រៅជាងពីមុនៗទៀត៕

ដើម្បីទទួលបានព័ត៌មានបន្ថែម និងថ្មីៗ ព្រមទាំងរហ័សពីគេហទំព័រខ្មែរឡូត សូមចូលទៅកាន់តេឡេក្រាម៖ https://t.me/khmerload