សង្វេគណាស់! ចង់រត់ចេញពីមន្ទីរពេទ្យ អ្នកជំងឺកូវីដ១៩ញៀនថ្នាំម្នាក់ វាយមន្រ្តីយោធាប្រចាំការនៅមន្ទីរបង្អែកស្រុកពញ្ញាក្រែក រហូតទាល់ស្លាប់

ខេត្តត្បូងឃ្មុំ: កាលពីពេលថ្មីៗកន្លងទៅនេះ បុរសជាអ្នកជំងឺកូវីដ១៩ម្នាក់ បានវាយអ្នកយាមជាយោធាប្រចាំម្នាក់បណ្តាលឱ្យស្លាប់ ក្នុងគោលបំណងដើម្បីរត់ចេញពីមន្ទីរពេទ្យបង្អែកស្រុកពញាក្រែក នៅល្ងាចថ្ងៃទី២៥ ខែឧសភា ឆ្នាំ២០២១កន្លងទៅពីម្សិលមិញនេះ។

យោងតាមប្រភពពីមន្រ្តីអាវុធហត្ថស្រុកពញាក្រែកបានឱ្យដឹងថា បុរសជាយោធា និងជាជនរងគ្រោះឈ្មោះ មាន វ៉ៃ អាយុ២៩ឆ្នាំ រស់នៅភូមិហួចកើត ឃុំក្រែក ស្រុកពញាក្រែក ខេត្តត្បូងឃ្មុំជាមន្រ្តីយោធាផ្នែកសឹករងស្រុកពញាក្រែក ត្រូវបានអង្គភាពបញ្ជូនទៅយាមនៅមន្ទីរពេទ្យបង្អែកស្រុកពញាក្រែក ដើម្បីចូលរួមត្រួតពិនិត្យអ្នកជំងឺ និងបំពេញការងារជាអ្នកយាមប្រចាំការនៅមន្ទីរពេទ្យខាងលើ ប៉ុន្តែជាអកុសលត្រូវទទួលមរណភាពដោយសារតែហេតុការណ៍ដ៏នឹកស្មានមិនដល់មួយនេះទៅវិញ។

យ៉ាងណាមិញ ចំពោះអត្តសញ្ញាណជនសង្ស័យដែលញៀនថ្នាំនោះមានឈ្មោះថា មឿន ម៉ឺន អាយុ៣៨ឆ្នាំ មានទីលំនៅភូមិក្រពើសារ ឃុំដំរិល ស្រុកអូររាំងឪ ត្រូវបានចាប់ខ្លួនក្រោយធ្វើសកម្មភាពសម្លាប់ជនរងគ្រោះ និងកសាងសំណុំរឿងបញ្ចូនទៅតុលាការដើម្បីចាត់ការបន្តតាមនិតីវិធីច្បាប់។

សូមបញ្ជាក់ផងដែលថា ជុំវិញហេតុការណ៍លម្អិតនៃករណីឃាតកម្មខាងលើនេះ ដោយសារអំណាចនៃថ្នាំញៀន និងគំនិតអគតិ ជនសង្ស័យបានប្រើដំបង និងចបកាប់វាយចំសៀតផ្កា របស់ជនរងគ្រោះកំពុងអង្គុយយាមម្នាក់ឯងរហូតដល់ស្លាប់ ខណៈអ្នកយាមដទៃទៀតកំពុងនៅហូបបាយ។ ក្រោយកើតហេតុ ឃាតករត្រូវបានបញ្ជូនទៅដាក់ក្នុងបន្ទប់ព្យាបាលអ្នកទោស ក្នុងមន្ទីរពេទ្យ រីឯសាកសពជនរងគ្រោះ បានយកទៅបូជានៅវត្តសមាធិ ក្នុងស្រុកពញាក្រែក៕

ដើម្បីទទួលបានព័ត៌មានបន្ថែម និងថ្មីៗ ព្រមទាំងរហ័សពីគេហទំព័រខ្មែរឡូតសូមចុច៖ https://t.me/khmerload