ហួសចិត្ត! គ្រាន់តែសេះមួយក្បាលងាប់សោះ ប្រជាជនឥណ្ឌា នាំគ្នាសម្រុកទៅគោរពបូជា បំពានវិធានការកូវីដ១៩ ( មានវីដេអូ)

ឥណ្ឌា៖ អ្នកភូមិឥណ្ឌារាប់រយនាក់ បានបំពានបម្រាមបិទខ្ទប់នៅក្នុងប្រទេសឥណ្ឌា ដោយបានពិធីចូលរួមពិធីបុណ្យសពសត្វសេះ ស្របពេលដែលប្រទេសនេះ មានករណីស្លាប់ដោយសារជំងឺកូវីដ១៩ កើនឡើងដល់ ៣០០,០០០ នាក់ហើយ។

តាមប្រភពរបស់ប៉ូលីស បានឱ្យដឹងថា អ្នកភូមិនៅភាគខាងត្បូងរដ្ឋ Karnataka បានប្រមូលផ្តុំគ្នានៅថ្ងៃអាទិត្យ ដើម្បីគោរពបូជា ដល់សត្វសេះ ដែលប្រជាជនឥណ្ឌា មានជំនឿនៅក្នុងសាសនារបស់ខ្លួន។

តាមរយៈវីដេអូមួយ បានបង្ហាញពីមនុស្សរាប់សិបនាក់បានប្រមូលផ្តុំគ្នានៅទីសាធារណៈដើម្បីដាក់កម្រងផ្កា នៅលើដងខ្លួនសេះ មុនពេលដង្ហែរឆ្លងកាត់តាមដងផ្លូវ ដែលចូលរួមដោយមនុស្សរាប់រយនាក់ដែលភាគច្រើនមិនបានពាក់ម៉ាស់ និង រក្សាគម្លាតសុវត្ថិភាពសង្គម។

ប៉ូលីសឥណ្ឌា បាននិយាយថា ឥឡូវនេះភូមិនេះ ត្រូវបានបិទខ្ទប់ រយៈពេល ១៤ ថ្ងៃ ដោយគ្មាននរណាម្នាក់អនុញ្ញាតិអោយចូលរឺចេញ ខណៈពេលការធ្វើតេស្តរកកូវីដ១៩ កំពុងតែដំណើរការ។

គួររំលឹកដែរថា ប្រទេសឥណ្ឌា បានទទួលរងនូវរលកទី២នៃ ជំងឺកូវីដ១៩ ដ៏អាក្រក់បំផុតនៅលើពិភពលោក ដែលធ្វើឱ្យប្រទេសនេះមានករណីឆ្លងកាន់តែច្រើនដោយសារវីរុសបំប្លែងខ្លួនថ្មីៗនេះ៕

ប្រភព៖ Daily Mail