កម្ពុជា៖ នៅថ្ងៃពុធ ទី២៦ ខែឧសភា ឆ្នាំ២០២១ ត្រូវនឹងថ្ងៃសីល មានបាតុភូតធម្មជាតិធំៗចំនួនពីរនឹងកើតឡើងផ្ទួនៗ ដូចជាចន្ទ្រគ្រាស និងព្រះចន្ទខិតមកជិតផែនដីឬជាភាសាអង់គ្លេសហៅថា Supermoon ដែលនាំឲ្យព្រះចន្ទមានទំហំធំជាងពេលធម្មតាបន្តិច(៥.៩ភាគរយ ទៅ ៦.៩ភាគរយ)។ ចន្ទ្រគ្រាសកើតឡើងនៅពេល ភពផែនដីបាំងពន្លឺព្រះអាទិត្យ ហើយស្រមោលរបស់ផែនដីជះទៅកាន់តំបន់លើឋានព្រះចន្ទ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សប្រសិនជាអ្នករស់នៅក្នុងប្រទេសអូស្ត្រាលី ផ្នែកខ្លះនៃភាគខាងលិចសហរដ្ឋអាមេរិក ភាគខាងលិចទ្វីបអាមេរិកខាងត្បូង ឬក៏ក្នុងតំបន់អាស៊ីអាគ្នេយ៍ អ្នកអាចនឹងមើលឃើញឬយ៉ាងហោចណាស់មួយផ្នែកនៃបាតុភូតដ៏កម្រនេះ។ ចន្ទ្រគ្រាសមួយនេះនឹងកើតឡើង ប៉ុន្មានម៉ោងបន្ទាប់ពីព្រះចន្ទបានខិតទៅជិតចំណុចនៅកៀកផែនដី។
ក្នុងប្រទេសកម្ពុជា ចន្ទ្រគ្រាសនឹងចាប់ផ្ដើមកើតឡើងនៅម៉ោង១៥:៤៧ ហើយរាហ៊ូលេបព្រះចន្ទអស់ទាំងស្រុងរយៈពេល១៤នាទី (នៅម៉ោង១៨:១១ ដល់ ១៨:២៥) នាំឲ្យព្រះចន្ទប្រែទៅជាពណ៌ក្រហម និងបញ្ចប់ព្រឹត្តិការណ៍នេះទាំងមូលនៅម៉ោង២០:៤៩ ដោយបាតុភូតនេះមានរយៈពេលសរុប ៥ម៉ោងនិង២នាទី នេះបើយោងតាមគេហទំព័រ Time and Date។
គួរបញ្ជាក់ផងដែរថា ដោយសារបាតុភូតចន្ទ្រគ្រាសកើតឡើង មុនពេលព្រះចន្ទរះនៅក្នុងប្រទេសកម្ពុជា ទើបផ្នែកចាប់ផ្ដើមនៃបាតុភូតនេះ មិនត្រូវបានគេមើលឃើញនោះទេ រហូតដល់ព្រះចន្ទរះឡើង(ម៉ោង១៨:២០) គឺចំពេលដែលរាហ៊ូលេបព្រះចន្ទអស់តែម្ដង (Total Lunar Eclipse)៕
ដើម្បីទទួលបានព័ត៌មានបន្ថែម និងថ្មីៗ ព្រមទាំងរហ័សពីគេហទំព័រខ្មែរឡូត សូមចូលទៅកាន់តេឡេក្រាម៖ https://t.me/khmerload