ប៉ូឡូញ៖ កីឡាករខ្សែប្រយុទ្ធសញ្ជាតិប៉ូឡូញ Krzysztof Piatek បានបញ្ជាក់នៅលើបណ្តាញសង្គមកាលពីថ្ងៃសុក្រថារូបគេនឹងខកខានការប្រកួតក្នុងព្រឹត្តិការណ៍ Euro ឆ្នាំ ២០២០ បន្ទាប់ពីបានរងរបួសកជើងក្នុងការប្រកួតដណ្តើមពានរង្វាន់ក្នុងក្របខណ្ឌ Bundesliga របស់ក្លិប Hertha BSC ជាមួយក្លិប Schalke ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សកីឡាករ Piatek បានរងរបួសនៅក្នុងតង់ទី ២ នៃការប្រកួត ហើយត្រូវបានគេរំពឹងថានឹងមិនមានសកម្មភាពហ្វឹកហាត់និងប្រគួតទេក្នុងរយៈពេលប៉ុន្មានខែបន្ទាប់ពីទទួលការវះកាត់នៅព្រឹកថ្ងៃសុក្រ។
កីឡាករ Piatek បានសរសេរថា៖ "ក្នុងរយៈពេល ៣៦ ម៉ោងចុងក្រោយគឺពិបាកខ្លាំងណាស់សម្រាប់ខ្ញុំ។ ការរងរបួសបានធ្វើឲ្យខ្ញុំត្រូវបានលុបឈ្មោះចេញពីការប្រកួតក្នុងព្រឹត្តិការណ៍ Euro ឆ្នាំ ២០២០ ដែលខ្ញុំបានកំពុងតែសុបិនយ៉ាងខ្លាំងក្នុងការចូលរួម។ ទោះជាយ៉ាងណាក៏ដោយខ្ញុំជឿជាក់ថានៅក្នុងពិភពបាល់ទាត់ក៏ដូចគ្នាទៅនឹងជីវិតប្រចាំថ្ងៃផងដែរ គ្មានអ្វីកើតឡើងដោយគ្មានហេតុផលនោះទេ។ ខ្ញុំដឹងថាព្រះត្រូវតែមានផែនការមួយសម្រាប់ខ្ញុំ។"
សមាគមបាល់ទាត់ប៉ូឡូញ (PZPN) ក៏បានចេញសេចក្តីថ្លែងការណ៍ទាក់ទងនឹងកីឡាករ Piatek ផងដែរ។
វេជ្ជបណ្ឌិតប៉ូឡូញលោក Jacek Jaroszewski បាននិយាយថា "រឿងរ៉ាវដ៏អាក្រក់បំផុតត្រូវបានបញ្ជាក់។ ខ្សែប្រយុទ្ធរូបនេះនឹងមានពេលពី ៣ ទៅ ៤ ខែមុនពេលវិលត្រឡប់ទៅកាន់ទីលានវិញ។ ជាអកុសលការចូលរួមរបស់កីឡាករ Krzysztof Piatek នៅក្នុងព្រឹត្តិការណ៍ Euro ឆ្នាំ ២០២០ នាពេលខាងមុខគឺមិនអាចទៅរួចទេ។ យើងសោកស្តាយខ្លាំងណាស់ នេះគឺជាដំណឹងដ៏ក្រៀមក្រំ។ សូមលើកម្រាមដៃបួងសួងឲ្យគាត់បានឆ្លងកាត់ការវះកាត់ដោយជោគជ័យដើម្បីឱ្យគាត់ត្រឡប់ទៅទីលានវិញឱ្យបានឆាប់តាមដែលអាចធ្វើទៅបាន" ។
កីឡាករ Piatek ធ្លាប់លេងឲ្យក្រុមជម្រើសជាតិប៉ូឡូញ ១៨ ដងដោយរកបាន ៨ គ្រាប់។ ក្រុមជម្រើសជាតិប៉ូឡូញនឹងត្រូវប៉ះជាមួយក្រុមស៊ុយអែត, ស្លូវ៉ាគី និងក្រុមអេស្ប៉ាញក្នុងពូល E នៅឯការប្រកួតក្នុងព្រឹត្តិការណ៍ Euro ឆ្នាំ ២០២០ ៕
ប្រភព៖ Xinhua News