សោកស្ដាយណាស់! ព្រោះតែបែបនេះទើប Zlatan នឹងខកខានចូលរួមប្រកួតក្នុងព្រឹត្តិការណ៍ Euro ឆ្នាំ ២០២០

ទីក្រុងរ៉ូម៖ លោ​ក Janne Andersson គ្រូបង្វឹកក្រុមជម្រើសជាតិស៊ុយអែតបានបញ្ជាក់កាលពីថ្ងៃសៅរ៍ថាកីឡាករ Zlatan Ibrahimovic នឹងត្រូវអវត្តមានពីព្រឹត្តិការណ៍ Euro ឆ្នាំ ២០២០ ដោយសារបញ្ហារបួសជង្គង់។

កីឡាកររបស់ក្លិប AC Milan បានរងរបួសជង្គង់ក្នុងការប្រកួតក្របខណ្ឌ Serie A ទល់នឹងក្លិប Juventus កាលពីសប្តាហ៍មុន។ ការធ្វើរោគវិនិច្ឆ័យដំបូងបានបង្ហាញថាកីឡាករវ័យ ៣៩ ឆ្នាំរូបនេះត្រូវការរយៈពេលព្យាបាលអោយជាសះស្បើយ ៣ សប្តាហ៍ ប៉ុន្តែយោងតាមសេចក្តីថ្លែងការណ៍ចុងក្រោយរបស់ក្លិប AC Milan ខ្សែប្រយុទ្ធសញ្ជាតិស៊ុយអែតរូបនេះនឹងធ្វើការព្យាបាលបែបអភិរក្សដែលមានរយៈពេល ៦ សប្តាហ៍ទោះបីជាមិនចាំបាច់ត្រូវការវះកាត់ក៏ដោយ។

លោក Andersson បាននិយាយថា "ខ្ញុំបាននិយាយជាមួយកីឡាករ Zlatan Ibrahimovic នៅថ្ងៃនេះ តែជាអកុសលគាត់បានប្រាប់ខ្ញុំថារបួសរបស់គាត់នឹងរារាំងដល់ការចូលរួមរបស់គាត់នៅក្នុងព្រឹត្តិការណ៍ European Championship នៅរដូវក្តៅនេះ" ។

លោក​បាន​បន្ថែមថា "ពិតណាស់វាគួរឱ្យសោកស្តាយ ជាពិសេសសម្រាប់កីឡាករ Zlatan រួមទាំងពួកយើងផងដែរ។"

ព្រឹត្តិការណ៍ Euro ឆ្នាំ ២០២០ គ្រោងនឹងចាប់ផ្តើមនៅថ្ងៃទី ១១ ខែមិថុនា ខណៈដែលក្រុមជម្រើសជាតិស៊ុយអែតនឹងត្រូវប៉ះក្រុមអេស្ប៉ាញក្នុងការប្រកួតបើកឆាក៕

ប្រភព៖ Xinhua News