ពិសេសណាស់! Hat-Trick របស់ Torres យប់មិញធ្វើឲ្យគេបំបែកកំណត់ត្រារបស់ Messi តាំងពី១១ឆ្នាំមុន

អង់គ្លេស៖ កាលពីយប់ថ្ងៃទី១៥ ខែឧសភា កន្លងទៅនេះ ក្លិប Manchester City បានធ្វើដំណើរទៅប្រកួតជាមួយ New Castle ក្នុងក្របខណ្ឌ Premier League នៅឯកីឡដ្ឋាន St. James' Park ។

ក្នុងនោះដែរ ក្រុមរបស់លោកគ្រូ Pep Guardiola បានយកឈ្នះម្ចាស់ផ្ទះ ៤ ទល់នឹង ៣ ដែល ៤គ្រាប់នេះរកបានដោយ ខ្សែការពារ Joao Cancelo នៅនាទីទី៣៩ មុននឹង Ferran Torres រកបាន៣គ្រាប់ម្នាក់ឯងនៅនាទីទី ៤២,៦៤ និង ៦៦ ខណៈ New Castle រកបានដោយ Krafth នៅនាទីទី ២៥ តាមដោយ ការស៊ុតប៉េណាល់ទីរបស់ Joelinton នៅនាទីទី៤៥+៦ និង Joe Willock នៅនាទីទី ៦២ ។

យ៉ាងណាមិញអ្វីដែលពិសេសគឺ ខ្សែប្រយុទ្ធ Ferran Torres បានបំបែកកំណត់ត្រារបស់ Lionel Messi ក្លាយជាកីឡាករវ័យក្មេងបំផុតដែលរកបាន Hat-Trick ក្រោមការដឹកនាំរបស់លោកគ្រូបង្វឹក Pep Guardiola ដោយគិតលើការប្រកួតក្នុងលីគ។

Messi មានអាយុ២២ឆ្នាំនិង២០០ថ្ងៃ នៅពេលគេរកបាន Hat-Trick ក្នុងការប្រកួតទល់នឹង Tenerife កាលពីឆ្នាំ២០១០ ដែលកាលណោះគេលេងក្រោមការដឹកនាំរបស់ Pep ។

១១ឆ្នាំក្រោយមក Torres ដែលអាយុត្រឹមតែ ២១ឆ្នាំនិង ៧៥ ថ្ងៃបានក្លាយជាកីឡាករក្មេងជាងគេបំផុតដែលរកបាន Hat-Trick ក្រោមការដឹកនាំរបស់ Pep វិញ។

គួរបញ្ជាក់ផងដែរថា Ferran Torres បានស៊ុតបញ្ចូលទីចំនួន១២គ្រាប់ហើយសម្រាប់ Manchester City នៅរដូវកាលនេះដែលក្នុងនោះ ៥គ្រាប់កើតចេញពីការប្រកួតទាំង៥ចុងក្រោយរបស់គេ ហើយនេះជា Hat- Trick លើកទី២របស់គេហើយនៅរដូវកាលនេះដោយលើកទី១គឺ Torres រកបានក្នុងការប្រកួតនៅ Nations League ទល់នឹង អាល្លឺម៉ង់ ផងដែរ៕

ប្រភព៖ goal

Join us📲 : https://t.me/keylatop  ដើម្បីទស្សនាវីដេអូហាយឡាយ EPL កម្រិតច្បាស់ និងព័ត៌មានកីឡាសម្បូរបែប