អង់គ្លេស៖ កាលពីយប់ថ្ងៃទី១៤ ខែឧសភា កន្លងទៅនេះ ក្លិបបិសាចក្រហម Manchester United បានបើកទ្វារកីឡដ្ឋាន Old Trafford ស្វាគមន៍ក្រុមហង្សក្រហម Liverpool ក្នុងជំនួបនៃក្របខណ្ឌ Premier League ដែលលទ្ធផលនៃការប្រកួតគឺ Liverpool យកឈ្នះ Man UTD ៤ ទល់នឹង ២ ដល់ក្នុងដី។
៤គ្រាប់របស់ក្រុមភ្ញៀវ Liverpool រកបានដោយ Diogo Jota នៅនាទីទី៣៤, Roberto Firmino រកបាន២គ្រាប់ម្នាក់ឯងគឺនៅនាទីទី ៤៥+៣ និង ៤៧ បិទគូថដោយ Mohamed Salah នៅចុងម៉ោងនាទីទី៩០ ចំណែកឯខាង Man UTD រកបានដោយខ្សែបម្រើ Bruno Fernandes នៅនាទីទី១០ និង Marcus Rashford នៅនាទីទី៦៨។
១គ្រាប់របស់ Fernandes ទល់នឹង Liverpool នេះធ្វើឲ្យគេបំបែកកំណត់ត្រាក្លាយជាខ្សែបម្រើដែលស៊ុតបញ្ចូលទីបានច្រើនជាងគេក្នុងប្រវត្តិសាស្ត្រ Premier League សម្រាប់មួយរដូវកាល ដោយបានវ៉ាអតីតខ្សែបម្រើ Frank Lampard ដែលធ្លាប់ជាគ្រូបង្វឹករបស់ Chelsea ផងដែរ។
Bruno Fernandes រកបាន២៨គ្រាប់់ហើយនៅរដូវកាលនេះដែលនាំមុខ Frank Lampard ដែលរកបាន២៧គ្រាប់នៅរដូវកាល ២០០៩-២០១០ ដោយ Fernandes ស៊ុតបាល់ប៉េណាល់ទីបានតិចជាង Lampard មួយគ្រាប់ទៀតផង។
ក្នុងនោះដែរ Yaya Toure ជាប់ចំណាត់ថ្នាក់លេខ៣បន្ទាប់ពី Fernandes និង Lampard ដោយរកបាន២៤គ្រាប់នៅរដូវកាល ២០១៣-២០១៤ ។
គួររម្លឹកផងដែរថា Bruno Fernandes បានរួមចំណែកបង្កើតគ្រាប់បាល់ ៤៤គ្រាប់របស់ Man UTD ក្នុងការបង្ហាញខ្លួនសរុប៥០ប្រកួតនេះដែលមានតែ Eric Cantona និង Robin van Persie ប៉ុណ្ណោះដែលនាំមុខគេគឺរួមចំណែកបង្កើតបាន ៤៦ គ្រាប់ និង ៤៥គ្រាប់៕
សូមទស្សនាវីដេអូនៃការប្រកួតខាងក្រោម៖
ប្រភព៖ metro
Join us📲 : https://t.me/keylatop ដើម្បីទស្សនាវីដេអូហាយឡាយ EPL កម្រិតច្បាស់ និងព័ត៌មានកីឡាសម្បូរបែប