អ៊ីតាលី៖ ខ្សែប្រយុទ្ធ Cristiano Ronaldo ត្រូវបានគេរាយការណ៍ថាត្រូវមិត្តរួមក្រុមនៅ Juventus តោះតើយដាក់ដោយសារពួកគេមិនពេញចិត្តរឿងដែលកីឡាករសញ្ជាតិព័រទុយកាល់រូបនេះទទួលបានសិទ្ធិពិសេសលើសកីឡាករដទៃ ហើយពួកគេក៏ខឹងនឹងក្លិបដែលដូចជាផ្ដល់សេរីភាពឲ្យ Ronaldo ខ្លាំងពេក។
Ronaldo ទើបតែស៊ុតគ្រាប់ទី១០០របស់ខ្លួនឲ្យក្លិប Juventus ក្នុងការប្រកួតទល់នឹង Sassuolo ប៉ុន្តែរឿងរ៉ាវផ្ទៃក្នុងនៃការមិនពេញចិត្តរបស់មិត្តរួមក្រុមគេបានផ្ទុះឡើង ដោយត្រឡប់ទៅមុន Juventus ចាញ់ AC Milan ៣ ទល់នឹង ០ គឺ កីឡាករក្នុងក្រុមទាំងអស់ត្រូវមកហ្វឹកហាត់យ៉ាងសស្រាក់សស្រាំប៉ុន្តែ Cristiano Ronaldo បែរជាត្រូវក្លិបអនុញ្ញាតឲ្យឈប់សម្រាក ដោយសារគេជាប់មកទទួលឡាន Ferrari Monza ដែលមានតម្លៃដល់ទៅ ១.៤លានផោន(ស្មើនឹងប្រមាណ១.៩លានដុល្លារ) នៅឯតំបន់ Maranello ពីក្រុមហ៊ុន Ferrari ផ្ទាល់ដោយកាលណោះ Ronaldo ថែមទាំងបានធ្វើដំណើរទៅជាមួយលោកប្រធានក្លិប Andrea Agnelli និង CEO របស់ក្រុមហ៊ុន Exor គឺលោក John Elkann ផងដែរ។
មូលហេតុនេះហើយទើបកីឡាករដទៃទៀតក្នុងក្រុមមានអារម្មណ៍មិនពេញចិត្តដែលក្លិបដូចជាយកចិត្តយកថ្លើម ម្ចាស់ ballon d'Or ៥សម័យកាល នេះជ្រុលពេក ដោយពួកគេមិនចាត់ទុកថា Ronaldo ជាអ្នកដឹកនាំក្រុមមួយរូបដ៏ល្អនោះឡើយ។
ខណៈនោះដែរ ព័ត៌មានចចាមអារ៉ាមជាច្រើនទាក់ទងនឹងការចាកចេញរបស់ Cristiano Ronaldo នៅតែកើតមានឡើងជាហូរហែរ ដោយខ្លះបាននិយាយថាគេនឹងចាកចេញពី Juventus បើសិនក្លិបមិនអាចស្រវាកៅអីលេងពាន Champions League បាននោះទេ៕
ប្រភព៖ dailymail
Join us📲 : https://t.me/keylatop ដើម្បីទស្សនាវីដេអូហាយឡាយ EPL កម្រិតច្បាស់ និងព័ត៌មានកីឡាសម្បូរបែប