កីឡាករសំខាន់របស់ Aston មួយរូបនឹងខកខានក្នុងប្រកួតទល់នឹង Man Utd

បរទេស៖ បន្ទាប់ពីខកខានអស់ ១១ ប្រកួតដោយសារតែបញ្ហារបួស ប្រធានក្រុមរបស់ Aston Villa កីឡាករ Jack Grealish បានវិលមកហ្វឹកហ្វាត់ជាមួយមិត្តរួមក្រុមវិញហើយ តែមិនទាន់អាចចូលលេងនៅចុងសប្ដាហ៍នេះទល់នឹងបិសាចក្រហម Manchester United ទេ។

លោក Dean Smith អ្នកចាត់ការរបស់ Aston Villa បាននិយាយប្រាប់អ្នកកាសែតកាលពីម្សិលមិញថា Jack Grealish នឹងខកខាន ១២ ប្រកួតរួមទាំងការប្រកួតទល់នឹង Manchester United ព្រោះគេទើបតែវិលមកហ្វឹកហាត់វិញ ហើយរូបគេមិនទាន់ត្រៀមខ្លូនរួចរាល់សម្រាប់ប្រកួតមួយនេះនៅឡើយទេ។ លោកក៏បានបញ្ជាក់ដែរថា លោកចង់ឲ្យកីឡាកររូបនេះវិលមកជួយក្រុមវិញឲ្យកាន់តែលឿន តែអ្វីដែលសំខាន់គឺត្រូវធ្វើអ្វីដែលត្រឹមត្រូវតាមការណែនាំរបស់ក្រុមគ្រូពេទ្យ មិនមែនការប្រថុយឡើយ៕