លោក José Morais នឹងត្រូវជំនួសលោក Rogério Micale ក្នុងការដឹកនាំក្លិប Al Hilal SFC បន្តក្នុងរដូវកាលនេះ

រីយ៉ាដ៖ ក្លិប Al Hilal SFC របស់ប្រទេសអារ៉ាប់ប៊ីសាអូឌីតបានព្រមព្រៀងលក្ខខណ្ឌជាមួយលោក José Morais របស់ព័រទុយហ្កាល់ដើម្បីដឹកនាំក្រុមរហូតដល់ចប់រដូវកាលនេះ។

ក្លិប Al Hilal បានប្រកាសនៅលើគណនីធ្វីតធ័ររបស់ពួកគេកាលពីថ្ងៃអាទិត្យថាគ្រូបង្វឹកវ័យ ៥៥ ឆ្នាំលោក Morais បានជំនួសកន្លែងរបស់គ្រូបង្វឹកសញ្ជាតិប្រេស៊ីលលោក Rogério Micale ។

សេចក្តីថ្លែងការណ៍របស់ Al Hilal បាននិយាយថា “រដ្ឋបាលក្លឹបបានរៀបចំធ្វើកិច្ចព្រមព្រៀងជាមួយគ្រូបង្វឹកសញ្ជាតិព័រទុយហ្កាល់លោក José Morais និងជំនួយការរបស់គាត់រួចហើយដើម្បីដឹកនាំក្រុមឈុតធំរបស់ក្លិបរហូតដល់ចុងបញ្ចប់នៃរដូវកាលនេះដោយត្រូវជំនួសកន្លែងរបស់លោក Rogério Micale”។

លោក Micale បានបង្វឹកក្រុមឈុតធំក្លិប Al Hilal ក្នុងយុទ្ធនាការប្រគួតវគ្គជម្រុះតាមពូលនៃពានរង្វាន់ AFC Champions League ឆ្នាំ ២០២១ របស់ពួកគេដោយក្រុមជើងឯកប្រចាំទ្វីបឆ្នាំ ២០១៩ មួយនេះបានឈានទៅដល់វគ្គ ១៦ ក្រុមចុងក្រោយក្នុងនាមជាក្រុមមួយក្នុងចំណោមក្រុមដែលឈ្នះក្រុមខ្លាំងទាំង ៣ ផ្សេងទៀត។

លោក Morais នឹងវិលត្រឡប់ទៅប្រទេសអារ៉ាប៊ីសាអ៊ូឌីតជាលើកទីបីក្នុងអាជីពជាគ្រូបង្វឹករបស់គាត់ដោយធ្លាប់គ្រប់គ្រងក្លិប Al Hazm, ក្លិប Al Faisaly និងក្លិប Al Shabab ដែលគាត់បានបង្វឹកជាលើកដំបូងក្នុងឆ្នាំ ២០០៧ មុនពេលដឹកនាំពួកគេឆ្ពោះទៅតំណែងជើងឯកនៃពានរង្វាន់ Saudi Super Cup នៅ ៧ ឆ្នាំក្រោយ។

គ្រូបង្វឹកសញ្ជាតិព័រទុយហ្កាល់រូបនេះមានបទពិសោធន៍ច្រើនដោយបានគ្រប់គ្រងក្លិបនៅប្រទេសអាឡឺម៉ង់, ទុយនេស៊ី, តួកគី, ក្រិច, អង់គ្លេស, អ៊ុយក្រែននិងសាធារណរដ្ឋកូរ៉េខាងត្បូងដោយបានដឹកនាំក្លិប Jeonbuk Hyundai Motors ត្រឡប់មកវិញក្នុងការឈ្នះពានរង្វាន់ K League ១ នៅឆ្នាំ ២០១៩ និង ២០២០ ។

ហើយភារកិច្ចបន្ទាន់របស់លោក Morais គឺត្រូវរៀបចំដឹកនាំក្លិប Al Hilal សម្រាប់ការប្រកួតនៅថ្ងៃសៅរ៍ជាមួយក្លិប Al Shabab ៕

ប្រភព៖ The AFC