អីយ៉ាស់! Everton គ្រោងចូលចែចូវយកកីឡាករឧស្សាហ៍របួសរបស់ Barcelona រូបនេះ

អង់គ្លេស៖ ក្លិបស្ករគ្រាប់ Everton ត្រូវបានគេរាយការណ៍ថាបានត្រៀមខ្លួនរួចរាល់ហើយក្នុងការដាក់សំណើទិញយក ខ្សែបម្រើ Philippe Coutinho ដែលបច្ចុប្បន្នកំពុងលេងឲ្យក្លិបអ្នកមានបុណ្យ Barcelona ។

អតីតតារាឆ្នើមរបស់ Liverpool រូបនេះ បានស៊ុតបញ្ចូលទីបាម៥៤គ្រាប់ និងបញ្ជូនបាល់ចំនួន៤៥ គ្រាប់កំលុងពេលបង្ហាញខ្លួនសរុប២០១ប្រកួតនៅទឹកដីកីឡដ្ឋាន Anfield មុននឹងផ្លាស់ទៅ Barcelona នៅឆ្នាំ២០១៨ក្នុងតម្លៃខ្លួនដល់ទៅ ១២០លានផោន(ស្មើនឹងប្រមាណ១៦៦.៨លានដុល្លារ)។

ប៉ុន្តែពេលមកដល់ Camp Nou គឺ Coutinho បែរជាធ្លាក់ទម្រង់លេងនិងមិនសូវកាក់កបប៉ុន្មាន ដោយឈានដល់ការទទួលរងពាក្យរិះគន់ពីសំណាក់អ្នកគាំទ្រផងដែរ។

បន្ទាប់ពីចូលលេងបាន១៨ខែ គឺ កីឡាករសញ្ជាតិប្រេស៊ីលរូបនេះបានទៅលេងខ្ចីជើងនៅ Bayern Munich ១រដូវកាលដោយរួមចំណែកស៊ុតបញ្ចូលទី២គ្រាប់ជួយ Bayern Munich លត់ Barcelona ៨ ទល់នឹង ២ផងដែរហើយគេថែមទាំងបានលើកពាន Champions League ,Bundesliga និង DFB-Pokal ជាមួយក្លិបទៀតផង។

ពេលត្រឡប់មក Barcelona វិញគេក៏បានចូលលេងក្រោមការដឹកនាំរបស់លោកគ្រូបង្វឹក Ronald Koeman ប៉ុន្តែដោយសារគេបានរងរបួសធ្ងន់ក្នុងការប្រកួតទល់នឹង Eibar ដែលធ្វើឲ្យគេត្រូវធ្វើដំណើរទៅប្រទេសប្រេស៊ីលដើម្បីព្យាបាលរបួសបន្តប៉ុន្តែយោងតាម Marca គឺ Barcelona លែងចង់ទុក Coutinho ទៀតហើយ ទើបក្លិបព្យាយាមលក់គេចេញឲ្យបាន។

Everton គ្រោងនឹងបោះទឹកប្រាក់ចំនួន ៤០លានផោន(ស្មើនឹងប្រមាណ ៥៥.៥លានដុល្លារ)ដោយសារលោកគ្រូបង្វឹក Carlo Ancelotti ពិតជាចូលចិត្តចង់បាន Coutinho ណាស់៕

ប្រភព៖ football365

ដើម្បីទទួលបានព័ត៌មានឆាប់រហ័ស សូមចូលទៅកាន់ Group Telegram របស់ Khmerload តាមរយៈតំណភ្ជាប់ខាងក្រោម ៖

https://t.me/khmerload