ក្រុមហ៊ុន Blue Origin ស្រែកថាមិនសុខចិត្ត ពេលដែល SpaceX បានកិច្ចសន្យាផលិតយានសម្រាប់ណាសា

ប​រទេស៖ ក្រុមហ៊ុន Blue Origin ដែលជាក្រុមហ៊ុនរ៉ុក្កែតអវកាសរបស់មហាសេដ្ឋី Jeff Bezos បានកំពុងតវ៉ាមិនសុខចិត្តដោយសារតែ កិច្ចសន្យាផលិតយានទៅឋានព្រះចន្ទដែលមានចំនួនទឹកប្រាក់2.9ពាន់លានដុល្លារ របស់អង្គការ NASA បានទៅលើដៃគូប្រជែងរបស់ខ្លួនគឺក្រុមហ៊ុន SpaceX របស់លោក Elon Musk។

ក្រុមហ៊ុន Blue Origin បាននិយាយកាលពីថ្ងៃចន្ទថា ខ្លួនបានដាក់ពាក្យបណ្តឹងតវ៉ាទៅការិយាល័យ Government Accountability Office ដោយចោទប្រកាន់អង្គការណាសាថា បានលំអៀងលើអ្នកដេញថ្លៃកិច្ចសន្យានៅនាទីចុងក្រោយ។

កាលពីដើមខែនេះអង្គការណាសាបានផ្តល់កិច្ចសន្យាដល់ក្រុមហ៊ុន SpaceX ដើម្បីសាងសង់យានអវកាសមួយដើម្បីបញ្ជូនអវកាសយានិកទៅកាន់ឋានព្រះចន្ទនៅដើមឆ្នាំ2024 ដោយបានជ្រើសរើសក្រុមហ៊ុនរបស់លោក Musk លើក្រុមហ៊ុន Blue Origin និង Dynetics។

នៅក្នុងសេចក្តីថ្លែងការណ៍តាមអ៊ីម៉ែល Blue Origin បាននិយាយថា ដោយសារតែអង្គការណាសាបានផ្លាស់ប្តូរគោលដៅដេញថ្លៃនៅនាទីចុងក្រោយ ការសម្រេចបែបនេះបានបំបាត់ឱកាសសម្រាប់អ្នកប្រកួតប្រជែងដទៃទៀត ហើយមិនត្រឹមតែប៉ុណ្ណោះទេវាអាចនឹងពន្យារ ថែមទាំងបង្កគ្រោះថ្នាក់ដល់បេសកកម្មទៅកាន់ឋានព្រះចន្ទផងដែរ។ ដោយសារតែបញ្ហានេះ ខ្លួនក៏សម្រេចធ្វើការតវ៉ានេះ៕

  Join us: https://t.me/khmerload