រាជធានីភ្នំពេញ ៖ តារាចម្រៀងថ្មីវ័យក្មេងអាយុទើប២០ឆ្នាំ ដែលបានចូលប្រឡូកក្នុងពិភពសិល្បៈចម្រៀងកាលពីឆ្នាំ ២០០៨ មកនោះ ពេលនេះទើបតែច្រៀងថតសំឡេងចូលស៊ីឌីឱ្យផលិតកម្មថ្មីមួយបានតែ៤បទប៉ុណ្ណោះ។
កញ្ញា ជា នីតា ហៅ Ella ពេលនេះកំពុងតែពុះពារដើម្បីទាញយកប្រជាប្រិយភាពពីមហាជនទូទៅនៅក្នុងពិភពសិល្បៈចម្រៀងតាមរយៈការឡើងច្រៀងជាកិត្តិយសនៅលើឆាកប្រគំតន្ត្រីតាមស្ថានីយទូរទស្សន៍នានា។ ជាក់ស្តែងកាលពីថ្ងៃទី១១ មីនា ២០១២ កន្លងទៅនេះ Ella បានឡើងច្រៀងក្នុងកម្មវិធីតារាមាសតន្ត្រីនៃស្ថានីយទូរទស្សន៍អប្សរាប៉ុស្តិ៍លេខ១១ ដោយច្រៀងចំនួន៣បទ គឺទី១ បទ «ស្មានមិនត្រូវ» ទី២ បទ «សង្សារខ្ញុំណែនាំសង្សារថ្មី» ទី៣ បទ «សង្ស័យថាមានថ្មី» ដែលជាបទចម្រៀងសម្រាប់យុវវ័យសម័យបច្ចុប្បន្ននេះ ។ កញ្ញា ជា នីតា បានឱ្យដឹងថា នាងមានស្រុកកំណើតនៅទីក្រុងភ្នំពេញ ក្នុងសង្កាត់ទឹកល្អក់ទី២ ខណ្ឌទួលគោក ឪពុកឈ្មោះជា ចន្ធូ ជាកងទ័ពម្តាយឈ្មោះហ៊ិន សុផាន (ស្លាប់) Ella មានបងប្អូន៣នាក់ ក្នុងនោះប្រុសម្នាក់ នាងជាកូនពៅក្នុងគ្រួសារ ។
ដោយសារការស្រឡាញ់សិល្បៈចម្រៀងមិនអាចកាត់ផ្តាច់បាននៅឆ្នាំ ២០០៨ នាងបានឈប់សិក្សាត្រឹមថ្នាក់ទី១០ ហើយចូលហ្វឹកហាត់រៀនច្រៀងនៅក្នុងក្លឹបសិល្បៈមួយបានរយៈពេលបី-បួនខែក៏ចេញច្រៀងនៅតាមភោជនីយដ្ឋាននានាក្នុងទីក្រុងភ្នំពេញ រហូតមកដល់ចុងឆ្នាំ២០១១ នាងបានចុះកុងត្រានៅផលិតកម្មថ្មីក្នុងស្រុកមួយដែលរយៈពេលជាង៤ខែមកនេះ ទើបតែច្រៀងថតសំឡេងចូលស៊ីឌីបាន៤បទតែប៉ុណ្ណោះ គឺបទ «សង្ស័យថាបងមានថ្មី» បទ «គ្មានថ្ងៃណាដូចថ្ងៃមុន» បទ «ស្មានមិនត្រូវ» និងបទ «សង្សារខ្ញុំណែនាំសង្សារថ្មី» ដែលត្រៀមចេញលក់នាពេលចូលឆ្នាំខ្មែរខាងមុខនេះ ។
អ្នកគ្រប់គ្រងផលិតកម្មបានឱ្យកោះសន្តិភាពដឹងថា Ella បានចុះកុងត្រាជាមួយផលិតកម្មរយៈពេល៥ឆ្នាំ ដោយមានប្រាក់ឧត្តមប្រចាំខែ និងប្រាក់សម្រាប់បទចម្រៀងនីមួយៗ។ តែគេមិនបានប្រាប់ថា Ella មានប្រាក់ប្រចាំខែប៉ុន្មាននោះទេ ហើយក្នុងមួយបទក៏មិនដឹងថា ទទួលកម្រៃប៉ុន្មានដែរ ។
ពេលសម្ភាសន៍កញ្ញា Ella ហាក់ដូចជាមានការលាក់លៀមមិនហ៊ាននិយាយអ្វីច្រើននោះទេ។ សូម្បីតែអ្នកយកព័ត៌មានសួរទាក់ទងនឹងជីវិតស្នេហាថា តើពេលនេះនាងបានបើកបេះដូងសម្រាប់អ្នកណា ហើយឬនៅ Ella មិននិយាយអ្វីទេ ដោយគ្រាន់តែប្រាប់ថា ទុកឱ្យមហាជនតាមដាន ៕
ផ្តល់សិទ្ធដោយ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក តារា & កម្សាន្ដ និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
