ក្តៅៗ ទីបំផុតបុរសម្នាក់នេះ ត្រូវបានតុលការសម្រេចឃុំខ្លួនជាបណ្តោះអាសន្ន ក្រោយនាំកូវីដចម្លងគេឯង ផ្អើលពេញខេត្តកំពត

ភ្នំពេញ: ពុកម៉ែ បងប្អូន និងប្រិយមិត្ត ដែលនិយមតាមដានព័ត៌មានសង្គម បានជ្រាបរួចមកហើយថា កាលពីពេលថ្មីៗកន្លងទៅ មានករណីបុរសម្នាក់ បានគេចពីការធ្វើចត្តាឡីស័កទៅចូលរួមពិធីមង្គលការនៅខេត្តកំពត ដែលបានបង្កឲ្យមានការភ្ញាក់ផ្អើលយ៉ាងខ្លាំង ប៉ុន្តែនៅថ្ងៃនេះ បុគ្គលឈ្មោះ លាន់ ឡា ហៅ ឡា នេះ ត្រូវបានតុលាការសម្រេចឃុំខ្លួនបណ្ដោះអាសន្ន ដើម្បីចាត់ការបន្តតាមផ្លូវច្បាប់ ​ដោយសារតែបុគ្គលនេះបានប្រព្រឹត្តខុសផ្ទុយទៅនឹងច្បាប់ហាមប្រាម និងបំរាមរបស់រដ្ឋាភិបាលដូចខាងក្រោម÷

​១. ក្រោយពេល ធ្វើតេស្ដរកមេរោគកូវីដ-១៩ ​រួចហើយ គ្រូពេទ្យតម្រូវឲ្យធ្វើចត្តាឡីស័ក ១៤ ថ្ងៃនៅផ្ទះរង់ចាំលទ្ធផល តែបែរជាដើរហើរទៅស្ទឹម, ស្ប៉ា, ក្លឹបហាត់ប្រាណ និងទៅចូលរួមពិធីមង្គលការនៅខេត្តកំពតទៅវិញ

​ ២. ក្រោយគ្រូពេទ្យទាក់ទងទៅប្រាប់ថា វិជ្ជមានកូវីដ-១៩ រួចមក ​បុគ្គលរូបនេះ បានបបួលមិត្តភក្តិចំនួន ៥នាក់ ជិះឡានត្រឡប់មកភ្នំពេញវិញ។

យ៉ាងណាមិញ អំពើល្មើសរបស់បុគ្គលឈ្មោះ លាន់ ឡា បានធ្វើឲ្យប្រជាពលរដ្ឋចំនួន  ២០០នាក់ ត្រូវធ្វើចត្តាឡីស័ក និងមនុស្សចំនួន ​៣នាក់ ​ជិះឡានជាមួយនៅពេលនោះ ឆ្លងមេរោគកូវីដ១៩។

សូមបញ្ជាក់ផងដែរថាផ្អែកលើ មាត្រា៩ នៃច្បាប់ បទចម្លងដោយចេតនានូវជំងឺកូវីដ១៩ ដល់អ្នកដទៃ បុគ្គលដែលល្មើសនឹងច្បាប់នេះ នឹងត្រូវផ្ដន្ទាទោសដាក់ពន្ធធនាគារពី ៥ ឆ្នាំ ទៅ ១០ឆ្នាំ។

ដោយឡែកផ្អែកលើមាត្រា១៣ និងកថាខណ្ឌ ៣ និងមាត្រា ២២ នៃអនុក្រឹត្យស្តីពីច្បាប់ដដែលនេះបុគ្គលដែល មិនអនុវត្តកាតព្វកិច្ចក្នុងពេលធ្វើចត្តាឡីស័កនឹងត្រូវផ្តន្ទាទោសជាពិន័យអន្តរការណ៍ពី ៥ សែនរៀល ទៅ ២លានរៀល៕

ដើម្បីទទួលបានព័ត៌មានបន្ថែម និងថ្មីៗ ព្រមទាំងរហ័សពីគេហទំព័រខ្មែរឡូតសូមចុច៖ https://t.me/khmerload