អង់គ្លេស៖ លោកគ្រូបង្វឹក Pep Guardiola បាននិយាយថា ខ្សែប្រយុទ្ធ Raheem Sterling ត្រូវតែបង្កើនទំនុកចិត្តលើខ្លួនឯង ដើម្បីធ្វើយ៉ាងណាដើម្បីតំណែងជម្រើស១១នាក់ដំបូងក្នុងក្រុមមកវិញ។
កីឡាករសញ្ជាតិអង់គ្លេសរូបនេះមានឱកាសបានចូលលេងមិនសូវញឹកញាប់ដូចរដូវកាលមុនឡើយ ហើយលោកគ្រូ Pep ក៏បានបង្ហើបត្រង់ៗលោកគ្រូចូលចិត្តដាក់ ខ្សែបម្រើ Phil Foden និង ខ្សែប្រយុទ្ធ Riyad Mahrez ជាជាង Sterling។
Raheem Sterling ធ្លាប់ជាកូនសោរសំខាន់របស់ Manchester City នូវរយៈពេល៥ឆ្នាំកន្លងមកនេះដោយគេធ្លាប់ជួយក្រុមលើកពាន Premier League ២, FA Cup មួយ និង Carabao Cup ៣លើកប៉ុន្តែនៅរដូវកាលនេះរូបគេធ្លាប់និយាយថាគេមានអារម្មណ៍ចម្លែកណាស់ដែលមិនសូវមានឱកាសបានរត់លើទីលានដូចមុន។
យ៉ាងណាមិញ ទាក់ទងនឹងរឿងនេះដែរ លោកគ្រូបង្វឹក Pep Guardiola បានផ្ដល់បទសម្ភាសន៍ថា៖
Raheem គឺជាកីឡាករដ៏ពិសេសម្នាក់ ទាំងអតីតកាលនិងអនាគត។ ហេតុផលដែលគេមិនសូវបានជាប់ជម្រើស១១នាក់ដំបូងដូចនៅរដូវកាលមុនគឺមកពី Phil Foden និង Riyad Mahrez ឡើងជើងខ្លាំងពេក។ នោះជាហេតុផលតែម្យ៉ាងគត់ ប៉ុន្តែខ្ញុំគិតថាឱកាសនឹងនៅតែមានសម្រាប់គេ ហើយគេត្រូវតែខិតខំប្រឹងប្រែងត្រៀមខ្លួនឲ្យរួចរាល់ ដើម្បីបង្ហាញពីគុណភាពរបស់គេូដោយសម្បទារឹងមាំដូចដែលគេតែងតែធ្វើ។ អ្វីដែលកើតឡើងលើការប្រកួតជម្រើសជាតិគឺខ្ញុំមិនបានពាក់ព័ន្ធទេ ប៉ុន្តែខ្ញុំចង់ឲ្យកីឡាករអស្ចារ្យដែលខ្ញុំមានក្នុងដៃបានចូលលេងនៅជម្រើសជាតិរបស់ពួកគេ។ ទាំង Raheem Sterling, Nathan Ake, Eric Garcia និង John Stones គឺជាកីឡាករដែលពួកយើងមាន និងត្រូវចូលលេងនៅ Euros។ ទោះគេ(Raheem Sterling) មានតែគុណភាពតែគ្មានទំនុកចិត្តចំពោះខ្លួនឯងក៏វាមិនអាចទៅរួចដែរ។ បន្ទាប់ពីនិយាយជាមួយខ្ញុំ គេក៏មានទំនុកចិត្តលើខ្លួនឯងឡើងវិញ កីឡាករលំដាប់កំពូលទាំងអស់ត្រូវតែមានទំនុកចិត្តលើខ្លួនឯងនិងនិយាយថា ខ្ញុំនឹងបង្ហាញឲ្យពួកគេឃើញថាខ្ញុំអាចលេងបានដល់កម្រិតណា។
Raheem Sterling ធ្លាប់លេងឲ្យក្លិបហង្សក្រហម Liverpool កាលពីឆ្នាំ២០១២ ហើយនៅឆ្នាំ២០១៥ គេក៏បានផ្លាស់មកលេងនៅ Manchester City រហូតមកទល់បច្ចុប្បន្ន៕
ប្រភព៖ goal
ដើម្បីទទួលបានព័ត៌មានឆាប់រហ័ស សូមចូលទៅកាន់ Group Telegram របស់ Khmerload តាមរយៈតំណភ្ជាប់ខាងក្រោម ៖
https://t.me/khmerload
Bong I.T