អវកាសយានិកណាសា បានវិលត្រឡប់មកផែនដីវិញដោយសុវត្ថិភាព បន្ទាប់ពីនៅទីអវកាសអស់រយៈពេល៦ខែ

បរទេស៖ អវកាសយានិកអង្គការណាសា អ្នកស្រី Kate Rubins អាយុ42ឆ្នាំ បានវិលត្រឡប់មកផែនដីវិញដោយសុវត្ថិភាពកាលពីថ្ងៃសៅរ៍ បន្ទាប់ពីរស់នៅលើស្ថានីយអវកាសអន្តរជាតិអស់រយៈពេល6ខែ។ Rubins រួមជាមួយអវកាសយានិករុស្ស៊ីពីរនាក់ទៀតគឺ Sergey Kud-Sverchkov និង Sergey Ryzhikov បានមកដល់ភាគអាគ្នេយ៍នៃទីក្រុង Dzhezkazgan ប្រទេសកាហ្សាក់ស្ថាន ដោយការចុះចតប្រើឆ័ត្រយោងនៅម៉ោង10និង55នាទីព្រឹកម៉ោងក្នុងតំបន់នោះ។

ក្រុមអវកាសយានិកទាំងនេះបានបម្រើក្នុងបេសកកម្ម Expedition 63-64 ហើយបានចាប់ផ្តើមបេសកកម្មរបស់ពួកគេនៅថ្ងៃទី14 ខែតុលា ឆ្នាំមុន។

អង្គការណាសាបានរាយការណ៍ថា ក្នុងអំឡុងពេលបេសកកម្មរយៈពេល185ថ្ងៃចុងក្រោយរបស់ Rubins អ្នកស្រីបានធ្វើការស្រាវជ្រាវជាច្រើននៅលើស្ថានីយអវកាសអន្តរជាតិ ដោយរួមមានទាំងការពិសោធន៍លើបេះដូង ដែលសិក្សាពីផលប៉ះពាល់នៃទំនាញនិងកោសិកាសរសៃឈាមបេះដូង ដែលការសិក្សានេះអាចជួយឱ្យមានការយល់ដឹងបន្ថែមពីបញ្ហាបេះដូងនៅលើផែនដីយើងផងដែរ។ ការស្រាវជ្រាវរបស់នាងក៏រួមបញ្ចូលទាំងការសិក្សាលើលំដាប់ DNA និងការសិក្សាមីក្រូជីវសាស្រ្តផងដែរ។

ស្ថានីយអវកាសអន្តរជាតិ គឺជាមន្ទីរពិសោធន៍មួយដែលធ្វើដំណើរជុំវិញផែនដី។ ស្ថានីយដំបូងត្រូវបានបើកដំណើរការនៅខែវិច្ឆិកា ឆ្នាំ1998។

អ្នកស្រី Rubins នឹងវិលត្រឡប់ទៅផ្ទះរបស់នាងវិញនៅក្រុង Houston រដ្ឋតិចសាស់។ នាងគ្រោងនឹងនិយាយអំពីបេសកកម្មរបស់នាងនៅក្នុងសន្និសីទសារព័ត៌មានមួយ ដែលនឹងធ្វើឡើងនៅថ្ងៃពុធ៕