អឺរ៉ុប៖ កីឡាករ Kylian Mbappe មិនទាន់បានបន្តកុងត្រាថ្មីជាមួយនឹងក្លិបអ្នកមាន Paris Saint-Germain នៅឡើយទេ, ខណៈតាមសេចក្តីរាយការណ៍បានឱ្យដឹងថា PSG កំពុងត្រៀមនាំយកខ្សែប្រយុទ្ធរបស់ក្រុម Liverpool កីឡាករ Mohamed Salah មកជំនួសប្រសិនបើ Mbappe នឹងចាកចេញមែននោះ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សជាការពិតណាស់ បុរសសញ្ជាតិបារាំងត្រូវបានគេដឹងថា នៅសល់កុងត្រាក្នុងការរួមរស់នៅទឹកដី Parc des Princes ដល់ឆ្នាំ ២០២២ ខាងមុខ តួយ៉ាងភាគីទាំងពីរគឺមិនទាន់បានចុះកិច្ចព្រមព្រៀងលើកិច្ចសន្យាថ្មីណាមួយនៅឡើយទេ, ទន្ទឹមនឹងនេះ PSG ក៏កំពុងតែស្វះស្វែងរកខ្សែប្រយុទ្ធថ្មីផងដែរដើម្បីមកជំនួស ក្នុងករណីដែលបាត់បង់ខ្សែប្រយុទ្ធវ័យក្មេងរូបនេះ។
យោងតាមសេចក្តីរាយការណ៍របស់សារព័ត៌មាន Telefoot បានឱ្យដឹងថា ម្ចាស់ការពារតំណែងជើងឯក Ligue 1 បានត្រៀមជម្រើសរួចរាល់ហើយ ប្រសិនបើ Mbappe សម្រេចចិត្តនឹងចាកចេញមែននោះ ហើយក្លិបអ្នកមានបានត្រៀម Salah ដើម្បីមកជំនួសតំណែងនេះ។
គួរបញ្ជាក់ដែរថា តាំងតែពីបានចូលរួមជាមួយ Liverpool នៅឆ្នាំ ២០១៧ Salah បាននាំឱ្យ Liverpool ឈ្នះជើងឯក Champions League ១ ដង និង Premier League ចំនួន ១ ដងដូចគ្នា, ក្នុងនោះដែររូបគេក៏បានក្លាយជាខ្សែប្រយុទ្ធមុតស្រួចដែលសហការគ្នាបានល្អបំផុតជាមួយនឹងកីឡាករ Sadio Mane និង Roberto Firmino។
យ៉ាងណាមិញ បុរសសញ្ជាតិអេហ្ស៊ីបរកគ្រាប់បាល់សរុបឱ្យហង្សក្រហមបាន ១២២ គ្រាប់ និង បញ្ជូនឱ្យមិត្តរួមក្រុមសម្រេចគោលដៅបាន ៤៥ លើកផងដែរ៕
ប្រភព៖ Marca