រដូវកាលរបស់ Lucas Vazquez អាចនឹងត្រូវបញ្ចប់ បន្ទាប់ពីទទួលរងរបួសកំឡុងពេលប្រកួតទល់នឹង FC Barcelona

បរទេស៖ រដូវកាលរបស់ Lucas Vazquez អាចនឹងត្រូវឈានដល់ទីបញ្ចប់ ដោយសារតែរូបគេទទួលរងរបួសកំឡុងពេលការប្រកួតរវាង Real Madrid ជាមួយនឹង FC Barcelona កាលពីចុងសប្តាហ៍កន្លងទៅ។

កីឡាករខ្សែបម្រើសញ្ជាតិអេស្ប៉ាញត្រូវបានផ្លាស់ប្តូរចេញនៅចុងវគ្គទី១នៃការប្រកួតទល់នឹង FC Barcelona កាលពីថ្ងៃអាទិត្យក្រោយពីការប៉ះទង្គិចជាមួយរាមច្បង Sergio Busquets ដោយអចេតនា បណ្តាលឲ្យរូបគេបង្ខំចិត្តចេញក្រៅទីលានដោយជំនួសវិញដោយមិត្តរួមសញ្ជាតិគឺកីឡាករ Álvaro Odriozola។

យ៉ាងណាមិញ ក្រោយពីការពិនិត្យពីសំណាក់ក្រុមគ្រូពេទ្យរបស់ក្លិបរួចមកបានឲ្យដឹងថា Lucas Vazquez បានទទួលរងស្នាមប្រេះផ្នែកខាងក្រោមនៃជង្គង់ខាងឆ្វេងរបស់គាត់ដែលជាហេតុធ្វើឲ្យគាត់ត្រូវនៅក្រៅទីលានដើម្បីធ្វើការព្យាបាលរយៈពេលយូរ៕