ក្ដៅៗ រកឃើញអ្នកវិជ្ជមានកូវីដ១៩ បានទៅហាងលក់គ្រឿងសមុទ្រមួយនេះ អ្នកពាក់ព័ន្ធ សូម​ទៅធ្វើតេស្ដជាប្រញាប់

ភ្នំពេញ៖ នៅរសៀលថ្ងៃទី ១០ ខែមេសា ឆ្នាំ២០២១ អនុគណៈកម្មការស្រាវជ្រាវជំងឺកូវីដ-១៩ បានធ្វើការ​អំពាវនាវដល់ប្រជាពលរដ្ឋ ដែលបានទៅ ឬមានទំនាក់ទំនងជាមួយអ្នករស់នៅម្ដុំ ហាងគ្រឿងសមុទ្រ​​ 333​ (ជិតហាងកាហ្វេ ដាលី ផ្សារអូរឫស្សី) ស្ថិតនៅទីតាំង ១៦Eo ផ្លូវលេខ ១០៥ សង្កាត់​ បឹងព្រលិត ខណ្ឌ ៧មករា ចាប់ពីថ្ងៃទី ៣១ ខែមីនា ដល់ថ្ងៃទី ៦ ខែមេសា ឆ្នាំ២០២១ ប្រសិនបើមានអាការមិនស្រួល ឬសង្ស័យ សូមប្រញាប់ទៅធ្វើតេស្តជាបន្ទាន់ ដោយមូលហេតុ អ្នកជំងឺកូវីដ១៩ ជាជនជាតិវៀតណាម បានទៅទីតាំងខាងលើ និងបានដើរហើរនៅម្ដុំនោះ។

សូមបញ្ជាក់ថា ទីតាំងដែលបងប្អូនអាចទៅធ្វើតេស្ដរកជំងឺកូវីដ-១៩ បាន រួមមាននៅវិទ្យាល័យ​បាក់ទូក​ វិទ្យាល័យ​បឹង​ត្របែក​ មណ្ឌលសុខភាពចាក់អង្រែក្រោម មន្ទីរ​ពេទ្យខ្មែរ-សូវៀត​ សាលាបឋមសិក្សាសុភមង្គល និងមន្ទីរពេទ្យបង្អែកនៅតាមបណ្តាខេត្តនានា​។ ដោយឡែក អ្នកដែលគ្មានរោគសញ្ញា សូមដាក់ខ្លួនដាច់ដោយឡែក និងតាមដានសុខភាពរបស់ខ្លួនរយៈពេល ១៤ ថ្ងៃ ចាប់ពីថ្ងៃដែលអ្នកបានប៉ះពាល់ ឬទៅទីកន្លែងនោះ៕

ប្រភព៖ អនុគណៈកម្មការស្រាវជ្រាវជំងឺកូវីដ-១៩