មិនធម្មតា! លោកយាយវ័យ ៩០ឆ្នាំ បំបែកកំណត់ត្រា ក្លាយជាប្រធានការិយាល័យ​ ចំណាស់ជាងគេបំផុតនៅលើពិភពលោក

ជប៉ុន៖ យោងតាមប្រភពព័ត៌មាន UPI បានឱ្យដឹងថា លោកយាយជនជាតិជប៉ុន អាយុ ៩០ឆ្នាំម្នាក់ បានបំបែកកំណត់ត្រាពិភពលោកហ្គីណេស  ក្លាយជាប្រធានការិយាល័យ​ចំណាស់ជាងគេបំផុត​។

លោកយាយ​ Yasuko Tamaki ដែលគ្រោងនឹងប្រារព្ធខួបអាយុ ៩១ឆ្នាំ នៅថ្ងៃទី ១៥ ខែឧសភា នាពេលខាងមុខនេះ បានសម្តែងការភ្ញាក់ផ្អើលយ៉ាងខ្លាំង ដែលទទួលបាន​កំណត់ត្រាមួយនេះ ចាប់តាំងពីលោកយាយធ្វើការរនៅឧស្សាហកម្ម Sunco នៅក្នុងឆ្នាំ ១៩៥៦មកម៉្លេះ ដោយធ្វើការ ៥ថ្ងៃក្នុងមួយសប្ដាហ៍។

យ៉ាងណាមិញ លោកយាយ Tamaki បានប្រាប់ឱ្យដឹងថា មូលហេតុដែលធ្វើលោកយាយធ្វើការនៅក្រុមហ៊ុននេះបានយូរដល់ម្លឹង ក៏៏ព្រោះតែលោកយាយជាមនុស្សចូលចិត្តជួយអ្នកដទៃ ហើយបន្ទាប់ពីធ្វើនៅក្រុមហ៊ុនយូរៗទៅ វាក៏ក្លាយជាគោលដៅជីវិតរបស់គាត់ ដើម្បីធ្វើឱ្យប្រធាន អ្នកគ្រប់គ្រង និងបុគ្គលិកនៅទីនោះមានភាពសប្បាយរីករាយ។ លើសពីនេះ លោកយាយ Tamaki បានបន្ថែមថា គាត់គ្មានគម្រោងនឹងចូលនិវត្តន៍នោះទេ សម្រាប់ឆ្នាំបន្ទាប់ៗទៀតប្រសិនបើលោកយាយនៅអាចបន្ដទៅទៀតបាន៕