អនុគណៈកម្មការស្រាវជ្រាវជំងឺកូវីដ១៩ អំពាវនាវដល់អ្នកធ្លាប់ទៅមន្ទីរពហុព្យាបាលមួយកន្លែង ក្នុងសង្កាត់បឹងកក់១ ប្រញាប់ធ្វើតេស្ត

ភ្នំពេញ៖ យោងតាមសេចក្ដីជូនដំណឹងរបស់អនុគណៈកម្មការស្រាវជ្រាវជំងឺកូវីដ-១៩ បានអំពាវនាវដល់ប្រជាពលរដ្ឋ ដែលធ្លាប់បានចូលមន្ទីរពហុព្យាបាល និងសម្ភព ស្ដង់ដារ​ ធីខេ​ (Standard TK Polyclinic) ដែលមានទីតាំងស្ថិតនៅផ្ទះលេខ ៦ ផ្លូវលេខ ៥១៦ សង្កាត់បឹងកក់១ ​ខណ្ឌទួលគោក មេត្តាប្រញាប់ទៅធ្វើតេស្ដ ប្រសិនបានមានអាការសង្ស័យណាមួយ ដោយសារមានអ្នកផ្ទុកជំងឺកូវីដ-១៩ ធ្លាប់បានចូលទីនេះរយៈពេល៣ថ្ងៃ ចាប់ថ្ងៃទី០៥ ដល់ថ្ងៃទី០៨ ខែមេសា ឆ្នាំ២០២១​ ហើយបានប៉ះពាល់ផ្ទាល់ជាមួយបុគ្គលិកចំនួន ៤នាក់។  

ហើយទីតាំងដែលបងប្អូនអាចទៅធ្វើតេស្ដរកជំងឺកូវីដ-១៩ បាន មាននៅវិទ្យាល័យ​បាក់ទូក​ វិទ្យាល័យ​បឹង​ត្របែក​ មណ្ឌលសុខភាពចាក់អង្រែក្រោម មន្ទីរ​ពេទ្យខ្មែរ-សូវៀត​ សាលាបឋមសិក្សាសុភមង្គល និងមន្ទីរពេទ្យបង្អែកនៅតាមបណ្តាខេត្តនានា​។

ដោយឡែក សម្រាប់អ្នកដែលគ្មានរោគសញ្ញា សូមដាក់ខ្លួនដាច់ដោយឡែក និងតាមដានសុខភាពរបស់ខ្លួនរយៈពេល ១៤ ថ្ងៃ ចាប់ពីថ្ងៃដែលអ្នកបានប៉ះពាល់ ឬទៅទីកន្លែងនោះ៕

ប្រភព៖ អនុគណៈកម្មការស្រាវជ្រាវជំងឺកូវីដ-១៩