អង់គ្លេស៖ លោកគ្រូបង្វឹក Thomas Tuchel បានធ្វើការដាស់តឿនដល់ខ្សែប្រយុទ្ធ Tammy Abraham ថាគេនឹងមិនត្រូវលោកគ្រូដាក់ឲ្យចូលលេងជាជម្រើស១១នាក់ដំបូងញឹកញាប់នោះឡើយ និងថែមទាំងបញ្ជាក់ទៀតថាគេអាចនឹងមានភាពលំបាកក្នុងការវិលត្រឡប់មកលេងទៀងទាត់ដូចមុនវិញ។
តាំងពីលោកគ្រូ Tuchel មកដឹកនាំក្រុមតោខៀវ Chelsea កាលពីខែមករា គឺក្លិបមិនដែលស្គាល់រសជាតិចាញ់ឡើយប៉ុន្តែថ្មីៗនេះ កំណត់ត្រាមួយនេះត្រូវបានបំផ្លាញក្រោយ Chelsea ត្រូវ West Brom លត់ ៥ ទល់នឹង ២ ស្របពេល Abraham បានចូលលេង៩០នាទីពេញតែ១ប្រកួតគត់គឺទល់នឹង Barnsley ក្នុងពាន FA Cup ។
យ៉ាងណាមិញ Abraham ពិតជាចង់មាននាទីចូលលេងច្រើនជាងនេះដើម្បីឲ្យលោកគ្រូបង្វឹក Gareth Southgate នៃក្រុមជម្រើសជាតិអង់គ្លេស កោះហៅគេឲ្យទៅរួមក្រុមនៅព្រឹត្តិការណ៍ Euro 2020 នេះប៉ុន្តែ Tuchel បែរជាព្រមានគេថា លោកគ្រូនឹងមិនបន្ធូរបន្ថយយោគយល់ដាក់ឲ្យគេចូលលេងនោះឡើយ ហើយគេអាចនឹងប្រឈមនឹងលំបាកក្នុងការដណ្ដើមតំណែងមកវិញ។