រាជធានីភ្នំពេញ ៖ ជនសង្ស័យ២នាក់ដែលបានធ្វើសកម្មភាពលួចដំបងឆក់ និងទូរស័ព្ទដៃចំនួន៣គ្រឿងរបស់មន្ដ្រីប៉ូលិសម្នាក់កាលពីជាង១០ ថ្ងៃមុនត្រូវប៉ូលិសប៉ុស្តិ៍ទឹកថ្លាចាប់ខ្លួនបានកាលពីវេលាម៉ោង៦ និង៣០នាទីល្ងាច ថ្ងៃទី៩ មេសា នៅក្នុងភូមិស្លែងរលើង សង្កាត់ទឹកថ្លា ខណ្ឌសែនសុខ ។ ការចាប់ខ្លួនជនសង្ស័យ២នាក់នេះ ដោយសារតែជននេះយកដំបងឆក់ទៅលក់ឱ្យប្រជាពលរដ្ឋដែលនៅភូមិ ជាមួយមន្ត្រីប៉ូលិសដែលបាត់ ហើយក៏បានរាយការណ៍ ទើបមានការចាប់ខ្លួនតែម្ដង ។
ជនសង្ស័យទាំង២នាក់ ម្នាក់ឈ្មោះប្រាក់ វណ្ណៈ ភេទប្រុស អាយុ៣២ឆ្នាំ និងម្នាក់ទៀតឈ្មោះ លន់ ផល្លា ភេទប្រុស អាយុ២៣ឆ្នាំ ។ ជនទាំង២នាក់នេះមានមុខរបរមិនពិតប្រាកដស្នាក់នៅក្នុងភូមិស្លែងរលើង សង្កាត់ទឹកថ្លា ខណ្ឌសែនសុខ រីឯមន្ដ្រីប៉ូលិសឈ្មោះចាន់ សាវុធ ភេទប្រុស អាយុ២៥ឆ្នាំ ស្នាក់នៅក្នុងភូមិ-សង្កាត់កើតហេតុខាងលើ ។
តាមប្រភពព័ត៌មានពីមន្ដ្រីប៉ូលិសប៉ុស្ដិ៍ទឹកថ្លា ឱ្យដឹងថា កាលពីថ្ងៃទី២៦ មីនា កន្លងមក ជនរងគ្រោះឈ្មោះ ចាន់ សាវុធ បានបាត់ទូរស័ព្ទចំនួន៣គ្រឿងគឺម៉ាកអាយហ្វូន និងម៉ាកអិលជីចំនួន២គ្រឿង និងដំបងឆក់ចំនួន១ នៅបន្ទប់ក្នុងផ្ទះរបស់ខ្លួន ។ ក្រោយពីបាត់ទូរស័ព្ទនិងដំបងឆក់មន្ដ្រីប៉ូលិសរូបនេះបានប្រាប់ អ្នកភូមិហើយបានស្វែងរកដោយនឹកហួសចិត្ដមិនគួរចោរថ្លើមធំហ៊ាន ចូលលួចទ្រព្យសម្បត្ដិដល់ក្នុងបន្ទប់គាត់ដោយមិនញញើតបែបនេះឡើយ ។ ប៉ុន្ដែនៅវេលាម៉ោង៦និង៣០នាទីល្ងាចថ្ងៃទី៩ មេសា ស្រាប់តែមានអ្នកភូមិម្នាក់បានមកប្រាប់ពីភិនភាគដំបងឆក់ដែលខ្លួន បានបាត់ ហើយត្រូវយុវជនម្នាក់យកទៅលក់ឱ្យអ្នកភូមិនោះ ។ ពេលឮបែបនេះមន្ដ្រីប៉ូលិសរូបនោះបានទៅមើលស្គាល់ជារបស់ខ្លួនក៏ ធ្វើការឃាត់ខ្លួនជនសង្ស័យខាងលើនេះតែម្ដង ។
នៅចំពោះមុខ សមត្ថកិច្ច ជនសង្ស័យខាងលើបានសារភាពថា ពួកគេពិតជាបានលួចសម្ភារប៉ូលិសខាងលើប្រាកដមែន ។ បច្ចុប្បន្នប៉ូលិស ប៉ុស្ដិ៍ទឹកថ្លាកំពុងកសាងសំណុំរឿងដើម្បីបញ្ជូនទៅអធិការដ្ឋានខណ្ឌ ចាត់ការបន្ដតាមនីតិវិធី ៕
បុប្ផា កោះ
ផ្តល់សិទ្ធដោយ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
