Mbappe ស៊ុត២គ្រាប់ម្នាក់ឯង! PSG សងសឹក Bayern បានសម្រេច ក្រោយទៅយកឈ្នះដល់ក្នុងដី ៣-២ (មានវីដេអូ)

អាល្លឺម៉ង់៖ ក្រុមការពារជើងឯក Bayern Munich នឹងត្រូវធ្វើការធ្ងន់នៅជើងទី២ បន្ទាប់ពីភ្លាត់ចាញ់ក្រុម Paris Saint-Germain នៅជើងទី១ វគ្គ៨ក្រុម ព្រឹត្តិការណ៍ Champions League កាលពីយប់មិញ ដោយលទ្ធផល ៣ទល់នឹង២។

ក្នុងការប្រកួតនេះ ក្រុមភ្ញៀវ PSG ជាអ្នកបើកការនាំមុខមុន ២គ្រាប់ តាមរយៈការស៊ុតរបស់ខ្សែប្រយុទ្ធ Kylian Mbappe នៅនាទីទី៣ និង Marquinhos នៅនាទីទី២៨។ យ៉ាងណាមិញ ក្រុមម្ចាស់ផ្ទះ មិនបណ្ដោយឲ្យក្រុមយក្សបារាំងនាំមុខស្រួលៗនោះទេ ពោលគឺបានតាមស្មើវិញ ២គ្រាប់ ដោយកីឡាករ Eric Maxim Choupo-Moting និង Thomas Mueller នៅនាទីទី៦០។

ដោយឡែក គ្រាប់បាល់ជ័យជម្នះរបស់ PSG គឺកើតឡើងនៅនាទីទី៦៨ ដែលធ្វើបានដោយខ្សែប្រយុទ្ធវ័យក្មេង Mbappe ដដែល។

គួរបញ្ជាក់ដែរថា នេះអាចជាការសងសឹករបស់ PSG ក៏ព្រោះថា កាលពីវគ្គផ្ដាច់ព្រ័ត្ររដូវកាលមុន ក្លិបដែលមានមូលដ្ឋាននៅទីក្រុងប៉ារីសមួយនេះ បានឈឺចាប់របូតពាន UCL ក្រោមថ្វីជើង Bayern នេះឯង។

បន្ថែមពីនេះ សម្រាប់ការប្រកួតរវាងក្រុមទាំងពីរនៅជើងទី២ នឹងធ្វើឡើងនៅថ្ងៃទី ២៤ខែមេសាខាងមុខ ខណៈ PSG ហាក់មានភាគរយខ្ពស់​នឹងឆ្លងទៅវគ្គបន្ទាប់ ដោយសារមានគ្រាប់ចំណេញក្រៅដីដល់ទៅ៣គ្រាប់៕

បើចង់ឃើញការស៊ុតបញ្ចូលទីគ្នាជក់ចិត្តយ៉ាងណានោះ សូមទស្សនាវីដេអូខាងក្រោម៖