ដំរីថៃមួយហ្វូងនៅប៉ាតាយ៉ា បង្ខំចិត្ដដើរចម្ងាយ៥០០គីឡូម៉ែត្រត្រលប់ទៅស្រុកវិញនៅសុរិន្ទ ព្រោះតែវិបត្ដិកូវីដ-១៩ ពួកវាលែងមានការងារធ្វើដូចមុន (មានវីដេអូ)

សត្វដំរីទាំង ៥ក្បាលមកពីសុរិន្ទ បានមកធ្វើការនៅរមណីយដ្ឋានមួយកន្លែង ក្នុងក្រុងប៉ាតាយ៉ាអស់រយៈពេលជាង ៥ឆ្នាំហើយ។ ពីមុនយើងអាចរកចំណូលបាន១៥,០០០បាត (ប្រមាណ ៤៨០ដុល្លារអាមេរិក) រួមនឹងលុយធីបមួយចំនួនទៀត សម្រាប់ដំរីមួយក្បាលក្នុងមួយខែ​ តែចាប់តាំងពីមានវិបតិ្ដជំងឺកូវីដ-១៩ ចាប់ពីឆ្នាំមុនមក យើងមិនមានប្រាក់ចំណូលឡើយ។ យើងស៊ូទ្រាំរង់ចាំឲ្យស្ថានការល្អប្រសើរវិញជាង ១ឆ្នាំហើយមកទល់ពេលនេះ ប៉ុន្ដែនៅទីបំផុត យើងក៏បោះបង់ការរង់ចាំនេះតទៅទៀត ហើយសម្រេចចិត្ដវិលមកស្រុកកំណើតពួកយើងវិញនៅសុរិន្ទ។

ដំរីរបស់យើងត្រូវបង្ខំចិត្ដដើរ ព្រោះយើងមិនមានប្រាក់គ្រប់គ្រាន់ដើម្បីជួលឡានដឹកនោះទេ ហើយគ្នាយើងមួយចំនួនបានចុះដើរជាមួយដំរី និងមួយចំនួនទៀតជិះលើខ្នងពួកវា ដោយចម្ងាយទៅស្រុកកំណើតរបស់យើងគឺ ៥០០គីឡូម៉ែត្រ ដែលនឹងត្រូវចំណាយពេលប្រហែល២សប្ដាហ៍។ ហើយប្រជាជនក៏បានផ្ដល់ចំណី និងថតរូបជាមួយហ្វូងដំរីផងដែរ ខណៈពេលធ្វើដំណើរតាមផ្លូវ។