ល្អទៅៗហើយ! Lingard ស៊ុត១បញ្ជូន១ ជួយ West Ham យកឈ្នះ Wolves ឡើងមកឈរ Top 4 (មានវីដេអូ)

អង់គ្លេស៖ ក្លិបញញួរយក្ស West Ham United បានឡើងមកឈរលេខ៤ ក្នុងតារាង Premier League សប្ដាហ៍ទី៣១ បន្ទាប់ពីយកឈ្នះក្រុមចចកព្រៃ Wolverhampton Wanderers ដល់ក្នុងដី កីឡដ្ឋាន Molineux Stadium ដោយលទ្ធផល ២-៣ កាលពីរាត្រីថ្ងៃច័ន្ទកន្លងទៅ។

ក្នុងការប្រកួតដ៏ជក់ចិត្តនេះ ក្រុមភ្ញៀវ West Ham ជាអ្នកបើកឆាកនាំមុខ៣គ្រាប់ក្នុងមុន ក្នុងនោះខ្សែបម្រើដែលខ្ចីជើងពីក្រុមបិសាចក្រហម Manchester United កីឡាករ Jesse Lingard ជាកម្លាំងចលករដ៏សំខាន់ ក្នុងការរកគ្រាប់បាល់ទាំង៣នោះ ពោលគេរួមចំណែកស៊ុតខ្លួនឯងមួយគ្រាប់ នៅនាទីទី៦ និងបញ្ជូនឲ្យមិត្តរួ​មក្រុម កីឡាករ Jarrod Bowen សម្រេចទី១គ្រាប់ នៅនាទីទី៣៨ បន្ទាប់ពីខ្សែបម្រើ Pablo Fornals ធ្វើបាន១គ្រាប់នៅនាទីទី១៤។

យ៉ាងណាមិញ ក្រុមម្ចាស់ផ្ទះ ក៏មិនបណ្ដោយឲ្យ West Ham ឈ្នះដាច់ពេកទេ ពោលពួកគេ តដៃវិញបាន២គ្រាប់ ដែលជាការតែតរបស់កីឡាករ Leander Dendoncker នៅចុងតង់ទី១នាទីទី៤៤ និងការស៊ុតកាច់យ៉ាងល្អពីសំណាក់កីឡាករ Fabio Silva នៅនាទីទី៦៨។

គួរបញ្ជាក់ដែរថា ចាប់តាំងពី Lingard ផ្លាស់មកចូលរួមជាមួយ West Ham គេបានបង្ហាញទម្រង់លេងយ៉ាងលេចធ្លោ គួរឲ្យចាប់អារម្មណ៍ ជាក់ស្ដែងក្នុងចំណោមការបង្ហាញខ្លួន៧ប្រកួតឲ្យក្រុមលោក David Moyes គេរកបាន៥គ្រាប់ និងបញ្ជូនបាល់ឲ្យមិត្តរួមក្រុមបញ្ចប់ទីបាន៣ដង៕
បើចង់ឃើញការស៊ុតបញ្ចូលទីគ្នាជក់ចិត្តយ៉ាងណានោះ សូមទស្សនាវីដេអូខាងក្រោម៖