ខេត្តបាត់ដំបង ៖ យុវជនម្នាក់ត្រូវសមត្ថកិច្ចមូលដ្ឋានចាប់ខ្លួនតាមដីកា កាលពីរសៀលថ្ងៃទី១០ មេសា នៅចំណុចភូមិកកោះ ឃុំកកោះ ស្រុកមោងឫស្សី បន្ទាប់ពីរត់ចោលស្រុកជាង២ឆ្នាំ ដោយសារជាប់ពាក់ព័ន្ធនឹងសំណុំរឿងល្បួង នាងក្រមុំម្នាក់យកទៅរំលោភសេពសន្ថវៈនៅក្បែរផ្ទះ។
មន្រ្តីនគរបាលព្រហ្មទណ្ឌផ្នែកអនុវត្តន៍ដីកាបានឲ្យដឹងថា ជនត្រូវចោទឈ្មោះញ៉ក់ ស៊ីរ៉ា ហៅហឿម អាយុ២២ឆ្នាំ នៅភូមិទូលព្រំ១ ឃុំកកោះ ស្រុកមោងឫស្សី។ ជននេះបានរត់គេចខ្លួនជាង២ឆ្នាំ ក្រោយពីប្រព្រឹត្តបទល្មើស។ មន្រ្តីដដែលបានប្រាប់ថា ជននេះត្រូវបានចោទប្រកាន់ពីបទ «រំលោភសេពសន្ថវៈ» ដែលប្រព្រឹត្តកាលពីថ្ងៃទី១៥ មិថុនា ឆ្នាំ២០០៩ នៅភូមិទូលព្រំ១ ឃុំកកោះ ស្រុកមោងឫស្សី ហើយត្រូវបានចៅក្រមស៊ើបសួរលោកគឹម រ៉ាវី ចេញដីកាបញ្ជាឲ្យចាប់ខ្លួនលេខ៤៥៩ ចុះថ្ងៃទី៣ មិថុនា ២០១០ ក្រោយពីជននេះមិនព្រមចូលមកបង្ហាញខ្លួនតាមដីកាកោះរបស់តុលាការ ហើយព្យាយាមរត់គេច។
តាមចម្លើយបំភ្លឺរបស់ជនត្រូវចោទឈ្មោះញ៉ក់ ស៊ីរ៉ា ហៅហឿម បាននិយាយថា នារីដែលប្ដឹងចោទប្រកាន់មកលើខ្លួននោះឈ្មោះហ.ឆ.វ អាយុ១៧ឆ្នាំ នៅក្នុងភូមិជាមួយគ្នា។ យុវជននេះបានរំលឹកថា កាលណោះពួកខ្លួនមានការព្រមព្រៀងគ្នា ព្រោះខ្លួននិងនាងបានស្រឡាញ់គ្នាដោយចិត្ត និងចិត្តគ្មានអ្នកណាបង្ខំអ្នកណាទេ។ ញ៉ក់ ស៊ីរ៉ា បានបញ្ជាក់ថា នៅវេលាម៉ោងប្រហែល៨យប់នោះ ខ្លួននិងនាងបានណាត់ជួបគ្នានៅខាងក្រោយផ្ទះ ហើយបានឱបថើបគ្នាដោយក្ដីស្រឡាញ់ ប៉ុន្តែចង្រៃអីពេលកំពុងតែឱបថើបគ្នារមូលសួត ស្រាប់តែមានគេដើរមកឃើញ ហើយគ្រានោះពួកខ្លួនក៏ងើបដើរបែកគ្នា ទៅផ្ទះរៀងៗខ្លួនទៅ។ ប៉ុន្តែស៊ីរ៉ាបានបញ្ជាក់ត្រង់ចំណុចនេះថា ពួកគេមិនទាន់ឈានដល់ការរួមមេត្រីទេ គ្រាន់តែត្រឹមដំណាក់ការឱបថើបគ្នាតែប៉ុណ្ណោះ។ ចំពោះការរត់គេចខ្លួន គឺដោយសារតែក្រុមគ្រួសារនាងប្ដឹង ទើបខ្លួនដាក់មេប្រូចទៅលាក់ខ្លួននៅតំបន់ព្រំដែនខ្មែរ-សៀមតែម្ដងទៅ លុះត្រឡប់មកផ្ទះវិញចូលគុកល្មម៕
បុប្ផា កោះ
ផ្តល់សិទ្ធដោយ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]