ស្មោះត្រង់ណាស់! សុនកមួយក្បាល រង់ចាំម្ចាស់នៅមន្ទីរពេទ្យអស់ពេល ២សប្ដាហ៍ ខណៈម្ចាស់កំពុងសម្រាកព្យាបាល

តួកគី៖ យោងតាមការចុះផ្សាយរបស់សារព័ត៌មាន Dailystar បានឱ្យដឹងថា សុនកស្មោះត្រង់មួយក្បាល បានរង់ចាំម្ចាស់របស់វានៅមុខមន្ទីរពេទ្យអស់រយៈពេល ២សប្ដាហ៍ ខណៈម្ចាស់កំពុងសម្រាកព្យាបាលនៅមន្ទីរថែទាំ។

លោកតា Mehmet Cakmak អាយុ ៨១ ឆ្នាំមានទីលំនៅសង្កាត់ Altinordu ក្នុងខេត្ត Ordu ភាគឦសាននៃប្រទេសតួកគី មានការខឹងសម្បាយ៉ាងខ្លាំងចំពោះការលេងរបស់ក្រុមបាល់ទាត់ ដែលគាត់ពេញចិត្តនៅក្នុងការប្រកួតថ្មីៗនេះ ជាហេតុធ្វើឱ្យគាត់គាំងបេះដូងតែម្តង ខណៈលោកកំពុងមើលការប្រកួតបាល់ទាត់ កាលពីថ្ងៃទី ១៣ ខែមីនា។

លោកតាត្រូវបានក្រុមគ្រូពេទ្យធ្វើការសង្គ្រោះបន្ទាន់ ទៅលើចង្វាក់បេះដូងឱ្យមានភាពប្រក្រតីឡើងវិញភ្លាមៗ មុននឹងបញ្ជូនរូបលោកទៅមន្ទីរពេទ្យក្នុងខេត្ត Ordu ដើម្បីព្យាលបាល​ ហើយលោកត្រូវទាមទារឱ្យសម្រាកព្យាបាលនៅមន្ទីរពេទ្យចំនួន ១៤ថ្ងៃសិន។ យ៉ាងណាមិញ Pamuk ដែលត្រូវជាសុនកចិញ្ចឹមរបស់លោកតា បានរង់ចាំម្ចាស់មិនព្រមទៅណា អស់រយៈពេល ១៤ថ្ងៃ បន្ទាប់ពីកូនប្រុសរបស់លោកតា បាននាំវាទៅលេងលោកតា Mehmet Cakmak នៅឯមន្ទីរពេទ្យ ដែលជាហេតុធ្វើឱ្យក្រុមគ្រូពេទ្យនៅទីនោះឃើញដូចនេះ មានចិត្តអាណិតក៏បានផ្ដល់ជាចំណី និងទឹកដល់វា។

គួរជម្រាបថា Pamuk មានការត្រេកអរយ៉ាងខ្លាំង បន្ទាប់ពីឃើញម្ចាស់របស់វាត្រូវបានគ្រូពេទ្យអនុញ្ញាត ឱ្យមកសម្រាកនៅផ្ទះវិញ ហើយវាមិនក៏ព្រមទៅណាឆ្ងាយពីម្ចាស់របស់វាដែរ ទោះបីលោកតា Mehmet Cakmak ត្រូវបន្តសម្រាកព្យាបាលនៅផ្ទះក៏ដោយ៕